Mickoski pas takimit me Janshën: Maqedonia kërkon proces të drejtë dhe të parashikueshëm drejt BE-së

Në Nju Jork, kryeministri Hristijan Mickoski u takua me homologun e tij slloven, Janez Jansha, me të cilin bisedoi për perspektivën evropiane të Maqedonisë, forcimin e marrëdhënieve politike dhe ekonomike mes dy vendeve, si dhe për zhvillimet e fundit gjeopolitike e të sigurisë në Evropë dhe rajon.

Mickoski deklaroi pas takimit se vendi i tij mbetet i angazhuar për integrimin në Bashkimin Evropian dhe zbatimin e reformave. Sipas tij, procesi duhet të mbështetet te kriteret e përmbushura dhe rezultatet konkrete të arritura nga Maqedonia.

Kryeministri theksoi se Shkupi nuk kërkon trajtim të privilegjuar apo një rrugë të shkurtër drejt BE-së, por një procedurë të drejtë dhe të parashikueshme, ku arritjet të merren parasysh dhe vendi të trajtohet me respekt si shtet dhe partner.

Ai e cilësoi Slloveninë si një mik të kahershëm dhe partner të rëndësishëm të Maqedonisë në BE dhe NATO. Mickoski shtoi se të dyja palët ndajnë interesin për zgjerimin e bashkëpunimit ekonomik, shtimin e investimeve dhe zbatimin e projekteve konkrete.