Mickoski: Disa shtete të BE-së synojnë të prekin identitetin e Maqedonisë së Veriut

Kryeministri Hristijan Mickoski deklaroi se Maqedonia e Veriut beson te vlerat evropiane dhe do të vijojë përpjekjet për të gjetur një zgjidhje për ngërçin aktual. Ai i bëri këto komente gjatë Samitit “Konkordia” në Nju Jork, i cili po mbahet paralelisht me Asamblenë e Përgjithshme të Kombeve të Bashkuara.

Gjatë një paneli me zëvendëskryeministren e Gjeorgjisë, Maka Botçorishvilli, Mickoski foli për pengesat që ka hasur procesi i integrimit evropian. Sipas tij, disa vende anëtare të BE-së po përpiqen ta përdorin këtë proces për të ndryshuar identitetin maqedonas.

“Rrugëtimin tonë e nisëm pothuajse dy dekada e gjysmë më parë, por për fat të keq disa arsye artificiale na penguan të anëtarësoheshim në BE. Ndoshta një ditë do ta arrijmë këtë pikë të rëndësishme. Deri atëherë, zhgënjimi i qytetarëve maqedonas është i madh, pasi në të kaluarën kemi bërë shumë lëshime: kemi ndryshuar flamurin, kemi amenduar disa herë Kushtetutën dhe kemi ndryshuar edhe emrin kushtetues. Për ne, kjo duket si një histori që nuk ka fund”, tha Mickoski.

Ai nënvizoi se, sipas tij, disa shtete anëtare të Bashkimit Evropian nuk synojnë ndryshimin e institucioneve të RMV-së, por të identitetit të vendit.

“Fatkeqësisht, disa vende anëtare po përpiqen të zgjidhin çështje dypalëshe dhe, në vend që të kërkojnë ndryshimin e institucioneve tona, kërkojnë të ndryshojnë identitetin tonë. Kështu jemi vendosur përballë një presioni: ose jeni brenda, ose jeni jashtë. Ndërsa nëse doni të jeni brenda, duhet të pranoni atë që kërkohet prej jush”, u shpreh Mickoski.

I pyetur për ekzistencën e mesazheve pozitive nga Brukseli, kryeministri tha se qëndrimet e përcjella në samitin e BE-së me vendet e Ballkanit Perëndimor në Tivat ishin jashtëzakonisht pozitive.