LSDM ngre kallëzim penal ndaj Klekovskit, Andonovskas, Lazovit dhe Ametit për ujin e ndotur në Gostivar

LSDM bëri të ditur sot se ka paraqitur kallëzim penal lidhur me rastin e ujit të kontaminuar në Gostivar. Kallëzimi është ngritur kundër ministrit të Shëndetësisë, Sashko Klekovski, drejtoreshës së Institutit të Shëndetit Publik, Marija Andonovska, drejtorit të Inspektoratit Shtetëror Sanitar dhe Shëndetësor, Kiril Lazov, si dhe drejtorit të Qendrës për Shëndet Publik – Tetovë, Shpendi Ameti.

Gjatë një konference për media, Jon Frçkoski, anëtar i Bordit Ekzekutiv të LSDM-së, deklaroi se partia kërkon përcaktimin e përgjegjësisë për ato që i cilëson si dështime dhe veprime jokompetente të institucioneve shëndetësore dhe inspektuese.

“Ka kaluar më shumë se një muaj, i gjithë qyteti i Gostivarit u helmua nga uji i kontaminuar. Pothuajse 5.000 qytetarë përfunduan në spital. Një katastrofë shëndetësore dhe një kolaps total i institucioneve”, deklaroi Frçkoski.

Sipas pretendimeve të LSDM-së, reagimi i institucioneve përgjegjëse ka qenë i vonuar, ndërsa qytetarët kanë konsumuar për 22 ditë ujë që partia e konsideron të pasigurt për shëndetin.

Frçkoski hodhi akuza edhe për mosveprim në kohë nga institucionet për përcaktimin e shkakut, megjithëse një numër i madh qytetarësh kishin raportuar probleme shëndetësore./Telegrafi/