LSDM kërkon dorëheqjen e Toshkovskit lidhur me largimin e Mihailovës

LSDM kërkon që të gjithë zyrtarët e përfshirë në largimin e Iva Mihailovës drejt Bullgarisë të mbajnë përgjegjësi, duke ngritur dyshime se pas këtij veprimi mund të ketë qëndruar një marrëveshje mes përfaqësuesve të pushtetit.

Sipas opozitës, ministri i Punëve të Jashtme, Timço Mucunski, ka zhvilluar negociatat, ndërsa ministri i Punëve të Brendshme, Pançe Toshkovski, ka siguruar procedurën e pakufizuar të tranzitit të Mihailovës përmes kufirit, me miratimin e kryeministrit Hristijan Mickoski.

“Në vend të përgjegjësisë nga Toshkovski, tani populli sheh teatër”, deklarojnë nga LSDM, duke e akuzuar qeverinë se po përpiqet t’ua kalojë fajin të tjerëve dhe po përdor një fushatë mediatike për ta larguar vëmendjen nga rasti.

Partia opozitare kërkon që të gjitha rrethanat e largimit të Mihailovës të hetohen në mënyrë të plotë, përfshirë edhe mundësinë nëse zyrtarë të caktuar kanë dhënë marrëveshje apo udhëzime.

LSDM kërkon dorëheqjen e ministrit të Punëve të Brendshme, Pançe Toshkovski, si dhe ndëshkimin e çdo personi për të cilin do të vërtetohet se ka qenë i përfshirë në këtë rast ose nuk ka vepruar brenda kompetencave të veta.

“Qytetarët e meritojnë të vërtetën dhe drejtësinë, ndërsa shteti meriton institucione që e zbatojnë ligjin”, theksojnë nga LSDM.