Këshilli i Prokurorëve Publikë nis procedurën për përzgjedhjen e drejtuesit të ri të PTHPNKOK

Mandati i Islam Abazit si kryeprokuror i Prokurorisë Themelore Publike për Ndjekjen e Krimit të Organizuar dhe Korrupsionit (PTHPNKOK) po shkon drejt përfundimit. Abazi u zgjodh në këtë detyrë në tetor të vitit 2022.

Në seancën e 50-të, e cila është parashikuar të zhvillohet sot, Këshilli i Prokurorëve Publikë pritet të krijojë strukturat që do të ndjekin procesin e zgjedhjes së drejtuesit të ri të PTHPNKOK.

Rendi i ditës parashikon ngritjen e Komisionit për Përgatitjen e Listave të Kandidatëve dhe të Komisionit për Zgjedhjen e një Kryeprokurori Publik të PTHPNKOK.

Deri tani, pesë prokurorë publikë kanë dorëzuar kandidaturat për këtë post. Kryetari i Këshillit të Prokurorëve, Bashkim Besimi, konfirmoi për AIM se në garë janë Prokurori i Lartë Publik Jove Cvetanovski, prokurori i Prokurorisë së Lartë Publike dhe ish-prokurori i PSP-së Trajçe Pelivanov, prokurorja e PSP Shkup Lidija Raiçeviç, si dhe prokurorët e PTHPNKOK Iskra Haxhi-Vasileva dhe Faton Azizi.

Thirrja për zgjedhjen e kreut të Prokurorisë Publike NKOK është publikuar në bazë të Ligjit për Këshillin e Prokurorëve Publikë dhe Ligjit për Prokurorinë Publike. Të drejtën për të kandiduar e kanë prokurorët publikë që, deri në momentin e aplikimit, kanë të paktën gjashtë vjet përvojë të pandërprerë në funksionin prokurorial dhe që gjatë tre viteve të fundit janë vlerësuar pozitivisht.

Zgjedhja e kryeprokurorit të ri publik të PTHPNKOK është planifikuar të bëhet më 28 tetor 2026.