Katër prokurorë në garë për drejtimin e Prokurorisë për Krim të Organizuar dhe Korrupsion

Në Këshillin e Prokurorëve Publikë deri tani janë dorëzuar katër kandidatura për drejtues të Prokurorisë Themelore Publike për Ndjekjen e Krimit të Organizuar dhe Korrupsionit (OJO GOKK). Afati i aplikimit mbyllet këtë fundjavë, ndërsa deri të hënën do të pranohen edhe aplikimet e nisura nëpërmjet postës, konfirmoi për Telma kryetari i Këshillit, Bashkim Besimi.

Për këtë funksion konkurrojnë prokurorja e OJO Shkup, Lidija Raiçeviq, prokurorët Iskra Haxhi Vasileva dhe Faton Azizi, si dhe Jove Cvetanovski, prokuror në Prokurorinë e Lartë Publike.

Cvetanovski kohët e fundit u kërkoi gjykatësve të Apelit që ta lënë në fuqi vendimin lirues për Nikolla Gruevskin në çështjen “Talir 2”. Ai gjithashtu e riaktivizoi rastin “Mazuti”, hetimi për të cilin ishte mbyllur nga OJO GOKK.

Kryeministri e vlerësoi si skandaloz vendimin për ndalimin e atij hetimi. Kritika ndaj Islam Abazit, i cili në atë periudhë drejtonte prokurorinë, dhe prokurores së çështjes, Kolareviq, pati edhe nga OBRM-PDUKM-ja në pushtet.

Në mars të këtij viti, Këshilli i Prokurorëve Publikë ia hoqi Cvetanovskit masën disiplinore dhe pezullimin, duke ia kthyer çështjen Komisionit Disiplinor për rishqyrtim. Pas këtij vendimi, ai rifilloi punën me lëndët.

Ndaj tij, Prokuroria e Shtipit ka paraqitur aktakuzë për keqpërdorim të pozitës zyrtare në lidhje me shpërndarjen e lëndëve. Megjithëse ka kaluar një vit, aktakuza ende nuk është shqyrtuar. Në të njëjtën çështje akuzohet edhe ish-eprori i tij, Mustafa Hajrullahi.

Kjo lëndë po dërgohet vazhdimisht nga Gjykata Themelore në Shtip në Gjykatën e Apelit në Shtip dhe anasjelltas.

Mbrojtja kishte kërkuar që provat të veçoheshin, por kërkesa fillimisht u refuzua nga Gjykata Themelore. Pas ankesës, gjykata më e lartë vendosi në favor të mbrojtjes dhe e anuloi vendimin. Megjithatë, Gjykata Themelore mori përsëri të njëjtin vendim dhe nuk e lejoi veçimin e provave, çka bëri që mbrojtja të ankohej sërish në Apelin e Shtipit.

Nga kjo gjykatë i thanë Telmës se lëndën e kanë marrë më 20 gusht dhe më pas e kanë dërguar për mendim në Prokurorinë e Lartë Publike në Shtip. Përgjigjja nga kjo prokurori ende nuk ka mbërritur.

Sipas Cvetanovskit, Komisioni Disiplinor ka marrë vendim lirues dhe nuk ka gjetur përgjegjësi disiplinore tek ai. Për aktakuzën, ai pretendon se nuk paraqet pengesë për pjesëmarrjen e tij në garë.

“Aktakuza nuk është e formës së prerë dhe nuk është pengesë. Ajo aktakuzë është ngritur mbi bazën e çështjes disiplinore dhe dihet pse është bërë”, deklaroi Jovan Cvetanovski, prokuror në Prokurorinë e Lartë Publike në Shkup.

Lidija Raiçeviq ka konkurruar më parë edhe për funksionin e Prokurorit Publik të Shtetit. Ajo ka udhëhequr çështjen për vrasjen e Pino Sekondos, rastin “Rover” ndaj Ljube Boshkovskit dhe rastin “Erasmus”, ndërsa aktualisht punon edhe me çështjen “Zhan Mitrev”.

Iskra Haxhi Vasileva ndodhet aktualisht në fokusin e opinionit për shkak të rastit kundër gjyqtarit Gjoko Ristov. Para se t’i hiqeshin kompetencat, ajo kishte drejtuar edhe çështjen “Zhan Mitrev”, si dhe rastin “Oriental”.

Faton Azizi është prokuror në çështjet “Aditiv”, FFM dhe “Botoks”. Ai vepron gjithashtu në rastin ndaj Tatjana Dimitrovskës, ish-kryetare e Komisionit Shtetëror për Parandalimin e Korrupsionit.

Drejtuesi i tanishëm i OJO GOKK-së, Islam Abazi, ka bërë të ditur së fundmi se nuk do të kërkojë një mandat tjetër.

Prokurorët do ta zgjedhin drejtpërdrejt drejtuesin e ri të Prokurorisë për Ndjekjen e Krimit të Organizuar dhe Korrupsionit përmes votimit që do të mbahet më 28 tetor.