Iva Mihailova tashmë në Bullgari: Për shkak të prejardhjes sime bullgare u shtypa në Maqedoninë e Veriut

Iva Mihailova, banore e Koçanit dhe e akuzuar në proceset gjyqësore për një aksident rrugor me viktimë mortale, ndodhet tashmë në territorin bullgar.

Këtë mëngjes televizioni bullgar “BTV” lajmëroi se Mihailova e ka kaluar kufirin Maqedoni-Bullgari, e shoqëruar nga avokati bullgar Nikolay Dimitrov. Sipas deklaratës së saj për median, arsyeja e kthimit ishte përkeqësimi i gjendjes shëndetësore.

“Kalavëm kufirin bashkë me avokatin tim. Për shkak se shëndeti im ishte përkeqësuar, ai më mori dhe u kthyem në Bullgari pa asnjë vështirësi. Në kufi tregova kartën e identitetit të Maqedonisë së Veriut. Këtu ndihem e sigurt. Në Maqedoninë e Veriut u shtypja për shkak të origjinës sime bullgare, dhe kjo ishte një nga arsyet pse ma ngritën akuzën”, deklaroi Mihailova për “BTV”.

Duke u pyetur nëse planifikon të kthehet në Maqedoninë e Veriut për seancën gjyqësore, e cila është caktuar për 9 nëntor, ajo u shpreh:

“Procesi do të vazhdojë pa mua ose me mua. Do të shohim si do të zhvillohet”.

Ndërsa, avokati Nikolay Dimitrov, i pyetur nga BTV, refuzoi të zbulojë cilin vendkalim kufitar përdorën, duke argumentuar se nuk dëshironte t’i vinte në pozitë të vështirë ata njerëz të cilët beson se i ka ndihmuar.

“Gjendja është e papranueshme dhe e kemi marrë fatin në duart tona”, përfundoi avokati Dimitrov./Telegrafi/