Gruevski hedh poshtë se apartamentet e konfiskuara i përkasin atij: Asnjëherë nuk kanë qenë pronë e imja

Nikolla Gruevski, ish-kryeministër, ka deklaruar në rrjetet sociale se apartamentet e konfiskuara në kuadër të rastit “Parcelat në Vodno” nuk janë të tijat.

Ai pretendon se i gjithë ky proces lidhet me një gjyq të sajuar politikisht, për të cilin fajëson ish-kryeministrin Zoran Zaev.

“Herë pas here, të njëjtat media publikojnë tituj dhe artikuj se gjoja apartamentet e mia janë sekuestruar dhe janë në shitje. Dhe, herë pas here, jam i detyruar të mohoj se ato apartamente nuk kanë qenë kurrë të miat dhe se e gjithë kjo është rezultat i një gjyqi kriminal të motivuar politikisht në të cilin qëllimi dhe motivet ishin politike dhe personale, që rrjedhin nga frika dhe urrejtja e kriminelit dhe tradhtarit të interesave kombëtare maqedonase Zoran Zaev. Fatkeqësisht, sot Zoran Zaev, duke investuar paratë e tij të përvetësuara në Dubai, Taxhikistan, Zvicër, Greqi dhe vende të tjera anembanë botës, dhe herë pas here duke pushuar në një jaht luksoz në Greqi, ende nuk i ndjen pasojat e krimeve të tij jo vetëm kundër meje, por edhe kundër Republikës së Maqedonisë dhe maqedonasve”, shkruan ai.

Disa ditë më parë u publikua lajmi se pronat e Gruevskit do të nxirren në shitje përmes një ankandi publik, ndërsa çmimi mesatar për metër katror arrin në mbi 3.400 euro.