Në shitje rikthehen apartamentet e Nikolla Gruevskit, vlera mesatare për metër katror kalon 3.400 euro

Pas konfiskimit nga shteti, në bazë të vendimit të formës së prerë në çështjen “Parcelat në Vodno”, apartamentet e ish-kryeministrit Nikolla Gruevski në kompleksin në Vodno janë nxjerrë sërish në shitje.

Ankandi publik për tri banesat luksoze është paraparë të mbahet më 29 korrik, ndërsa ato do të mund të shihen nga të interesuarit më 16 korrik.

Dy prej apartamenteve kanë secili nga rreth 200 metra katrorë hapësirë banimi dhe tarraca me sipërfaqe pak më të vogël se 50 metra katrorë. Çmimi fillestar i vendosur për secilin është 850.000 euro.

Banesa e tretë përfshin rreth 150 metra katrorë sipërfaqe dhe një ballkon prej 95 metrash katrorë, ndërsa del në shitje me çmim fillestar prej 760.000 euro.

Në total, vlera fillestare e këtyre tri pronave shkon në 2,46 milionë euro, me një çmim mesatar për metër katror që e kalon shifrën 3.400 euro.

Megjithatë, kjo shumë mund të rritet edhe më shumë gjatë zhvillimit të ankandit publik.

Këto apartamente karakterizohen nga hapësira të mëdha, tarraca të bollshme, pajisje luksoze, xhakuzi dhe pamje panoramike nga Shkupi.

Edhe më parë, dy prej këtyre apartamenteve ishin hedhur në treg, por shitja e tyre kishte dështuar për shkak se nuk pati blerës.

Konfiskimi i pronave erdhi pas procesit gjyqësor për rastin “Parcelat në Vodno”, ku ish-kryeministri Nikolla Gruevski mori dënim me nëntë vjet burg.

Ky rast lidhej me përvetësimin e paligjshëm të 1,3 milionë eurove nga donacionet partiake, të cilat më pas ishin përdorur për blerjen e tokës dhe ndërtimin e pasurive të paluajtshme.