Gashi nga Sofja: Rajoni ka nevojë për dialog, ndërsa RMV kërkon eurointegrim të drejtë dhe të parashikueshëm

Në adresimin e tij në Sesionin e 13-të Plenar të Asamblesë Parlamentare të Procesit të Bashkëpunimit të Evropës Juglindore, që u mbajt në Sofje, kryetari i Kuvendit Afrim Gashi vuri në pah se dialogu ndërparlamentar, fqinjësia e mirë dhe e ardhmja evropiane e rajonit mbeten elemente vendimtare për perspektivën e Evropës Juglindore.

Sipas tij, në një periudhë të shoqëruar me sfida gjeopolitike, vendet e rajonit duhet të dëshmojnë përgjegjësi dhe pjekuri politike, ndërsa parlamentet, përmes diplomacisë, duhet të forcojnë besimin dhe bashkëpunimin mes tyre.

Gashi deklaroi se Maqedonia e Veriut vazhdon të jetë e përkushtuar ndaj marrëdhënieve të mira fqinjësore, duke nënvizuar se integrimi në Bashkimin Evropian përfaqëson një orientim strategjik të shtetit, i mbështetur prej dekadash.

Ai theksoi gjithashtu se vendi ka kaluar një proces të vështirë, duke marrë vendime dhe kompromise historike në funksion të rrugës së tij evropiane.

Duke folur për integrimin, Gashi u shpreh se Maqedonia e Veriut i ka plotësuar kriteret dhe ka marrë vlerësime pozitive, por shpesh është përballur me kushte dypalëshe, të cilat kanë krijuar ndjenjë padrejtësie te qytetarët.

Në këtë kontekst, ai kërkoi që procesi i anëtarësimit në BE të zhvillohet mbi baza të parashikueshme, të drejta dhe sipas kritereve evropiane, duke paralajmëruar se zvarritjet dëmtojnë besimin ndaj projektit evropian.