Gashi para studentëve ndërkombëtarë: Procesi i integrimit evropian të Maqedonisë së Veriut duhet të japë përfitime konkrete për qytetarët

Kryetari i Kuvendit, Afrim Gashi, mbajti një fjalim para një delegacioni prej 36 studentësh ndërkombëtarë të studimeve pasuniversitare në Departamentin e Transformimit dhe Integrimit Evropian pranë Kolegjit të Evropës, Kampusi i Tiranës. Studentët, të cilët vijnë nga 19 vende evropiane, po qëndrojnë në Republikën e Maqedonisë së Veriut për një vizitë studimore.

Gjatë fjalimit, Gashi theksoi se integrimi evropian i Maqedonisë së Veriut është një orientim afatgjatë dhe strategjik, por njëkohësisht një proces që duhet t’u sjellë qytetarëve përfitime konkrete.

Ai u ndal edhe te kompleksiteti i procesit të anëtarësimit. Gashi kujtoi se nga Samiti i Selanikut i vitit 2003, i cili konfirmoi perspektivën e qartë evropiane të vendeve të rajonit sapo të plotësohen kushtet dhe kriteret e nevojshme, kanë kaluar 23 vjet. Duke marrë parasysh rrethanat e ndryshuara, ai e cilësoi sot zgjerimin e Bashkimit Evropian si çështje sigurie dhe stabiliteti. Po ashtu, vuri në pah rëndësinë e vlerësimit të kompromiseve, duke përkujtuar se vendi e ndryshoi emrin me qëllim të integrimit euroatlantik, ndërsa hapja e kapitujve të anëtarësimit në BE mungoi.

Më tej, Gashi theksoi rëndësinë e kryerjes së detyrave të brendshme nga vendet kandidate, përkatësisht të realizimit të agjendës së reformave dhe zbatimit të reformave në fusha si sundimi i ligjit, kapitali njerëzor, tranzicionet digjitale dhe të gjelbra, si dhe ekonomia. Këto, sipas tij, përbëjnë themelet për përmirësimin e cilësisë së jetës dhe afrimin me standardet evropiane. Në lidhje me Kuvendin, ai përsëriti angazhimin për një Dhomë Ligjvënëse të hapur dhe për zbatimin e standardeve më të larta, në mënyrë që t’u përgjigjet sa më mirë nevojave të qytetarëve, thuhet në njoftimin e kabinetit të Gashit.