Flamuri i Maqedonisë së Veriut u paraqit me 12 në vend të 8 rrezeve, opozita denoncon skandal në festën shtetërore

Në kuadër të kremtimit të 35-vjetorit të pavarësisë së Maqedonisë së Veriut, mbrëmjen e djeshme në Ohër u shfaq një flamur me 12 rreze, ndonëse simboli zyrtar ka 8 të tilla.

Ngjarja muzikore me titull “Shkëlqeu fuqishëm dita” u organizua në stadiumin “Burimet e Biljanës”. Me këtë spektakël në Ohër nisi turneu i paralajmëruar në 11 qytete të vendit, ndërsa aktiviteti përfundimtar pritet të zhvillohet më 4 shtator në Shkup.

Paraqitja e flamurit në këtë formë shkaktoi reagime të forta nga opozita.

“Gjatë një ceremonie zyrtare shtetërore kushtuar 35-vjetorit të pavarësisë, për të cilën janë paguar shuma të mëdha nga paratë e qytetarëve, qeveria e Mickoskit e paraqiti gabimisht flamurin e Maqedonisë”, deklaroi LSDM-ja.

Partia opozitare i kërkoi Qeverisë të publikojë emrin e kompanisë së kontraktuar për organizimin, shumën e shpenzuar për festën dhe personin që do të marrë përgjegjësinë për këtë lëshim.

VMRO-DPMNE-ja iu përgjigj pretendimeve të LSDM-së lidhur me flamurin e shfaqur në koncertin e 35-vjetorit të pavarësisë. Sipas sqarimit të saj, bëhej fjalë për një instalacion artistik, në të cilin një diell me shumë rreze shndërrohej në flamurin zyrtar me tetë rreze. Partia theksoi gjithashtu se LSDM-ja, e cila ka ndryshuar flamurin, emrin dhe Kushtetutën, nuk gëzon asnjë besueshmëri për të ngritur akuza për cenim të dinjitetit shtetëror. /INA/