Mickoski: Festimet e pavarësisë u ndoqën nga mbi 200 mijë qytetarë, kritikat e LSDM-së nuk më shqetësojnë

Kryeministri Hristijan Mickoski i quajti të pabazuara kritikat e LSDM-së për shpenzimet e 35-vjetorit të pavarësisë dhe koncertin e DJ-it të njohur ndërkombëtarisht, David Guetta. Sipas tij, aktivitetet, të zhvilluara përgjatë një muaji, ishin të suksesshme dhe u ndoqën nga më shumë se 200,000 qytetarë.

“Po e ndjek këtë shfaqje që opozita po përpiqet të ndërtojë. Mendoj se të vetmit që nuk janë të kënaqur me festimet e 35-vjetorit janë ata. Programi zgjati një muaj dhe gjithçka shkoi shkëlqyeshëm. Më shumë se 200,000 qytetarë morën pjesë në të. Ne e vlerësojmë faktin që Maqedonia festoi me dinjitet”, deklaroi Mickoski.

I pyetur nga gazetarët për kundërshtimet e LSDM-së lidhur me performancën e David Guetta-s dhe fondet e përdorura, kryeministri përmendi edhe reagimin e madh publik ndaj njoftimit për pjesëmarrjen e artistit.

“Videoja që ka kaluar një milion shikime brenda 14 orësh dëshmon se sa shumë rëndësi kishte kjo performancë për qytetarët”, u shpreh ai.

Mickoski akuzoi më pas qeverinë e mëparshme dhe BDI-në për mënyrën e përdorimit të fondeve të Lotarisë Shtetërore, duke e lidhur këtë çështje me procedurat që aktualisht janë në zhvillim.

“Mund të them se ata që sot janë të dëshpëruar, në atë periudhë i çuan paratë në xhepat privatë të Përparimit dhe të të tjerëve, ndërsa ne po ua rikthejmë fondet e tepërta qytetarëve dhe artistëve. Në këtë pikë jam dakord me opozitën: ne nuk jemi njësoj”, tha Mickoski.

Ai përsëriti pretendimin se rezervat dhe fitimet e Lotarisë Shtetërore, gjatë qeverisjes së mëparshme, përfunduan në duar private, duke ia atribuar këtë përgjegjësi drejtpërdrejt LSDM-së dhe BDI-së.

“Së bashku me BDI-në, ata i transferuan rezervat dhe fitimet e Lotarisë në xhepa privatë”, deklaroi kryeministri.

Kreu i qeverisë bëri të ditur se mbështetja për aktivitete të ngjashme do të vijojë edhe në të ardhmen, bashkë me financimin e nismave në fushën e kulturës dhe sportit.

“Kjo Qeveri do të organizojë çdo vit ngjarje të tilla dhe do të përkrahë nismat kulturore e sportive. Ne besojmë se ky është funksioni i një kompanie me përgjegjësi shoqërore, si Lotaria Shtetërore, dhe një gjë e tillë parashikohet edhe në Ligjin e ri për Lojërat e Fatit”, tha Mickoski.

LSDM-ja e ka kritikuar së fundmi Qeverinë për financimin e aktiviteteve me rastin e 35-vjetorit të pavarësisë, duke u ndalur veçanërisht te fondet e lidhura me koncertin e David Guetta-s. Nga ana tjetër, Qeveria këmbëngul se paratë janë siguruar nga Lotaria Shtetërore dhe kompani me përgjegjësi shoqërore dhe se ato kanë mbuluar disa aktivitete të festimeve, jo vetëm performancën e Guetta-s.