Evropa regjistron mbi 240 raste të virusit të Nilit Perëndimor, Maqedonia ndër vendet më të prekura

Mbi 240 persona në Evropë janë konfirmuar këtë vit me virusin e Nilit Perëndimor, ndërsa Maqedonia renditet mes vendeve me numrin më të lartë të rasteve. Infeksioni përhapet përmes pickimit të mushkonjave të infektuara dhe, në forma të caktuara, mund të shkaktojë pasoja të rënda shëndetësore.

Të dhënat janë bërë publike në raportin javor të publikuar të premten nga Qendra Evropiane për Parandalimin dhe Kontrollin e Sëmundjeve (ECDC), e cila konfirmon se numri i të infektuarve në kontinent ka kaluar 240.

Italia kryeson listën me 139 raste, e ndjekur nga Greqia me 61. Në Spanjë janë evidentuar 17 raste, ndërsa në Maqedoni janë raportuar 13 persona të infektuar. Megjithatë, sipas të dhënave më të fundit të institucioneve vendase, deri dje numri i përgjithshëm i rasteve në këtë shtet ka arritur në 20. Rumania ka regjistruar gjashtë raste, Franca katër dhe Gjermania një rast.

Në fund të muajit të kaluar, Organizata Botërore e Shëndetësisë (OBSH) bëri thirrje për shtim të vigjilencës, pas raportimit të disa rasteve të etheve të Nilit Perëndimor në Evropën Jugore.

OBSH-ja shpjegon se virusi qarkullon zakonisht mes mushkonjave dhe zogjve. Kur mushkonjat infektohen, ato mund t’ua transmetojnë virusin njerëzve përmes pickimit, veçanërisht gjatë periudhës nga korriku deri në shtator.

Sipas Institutit Robert Koch (RKI), agjencisë gjermane përgjegjëse për kontrollin dhe parandalimin e sëmundjeve, pjesa më e madhe e personave të infektuar nuk e kupton se e bart virusin. Për këtë arsye, studiuesit mendojnë se numri real i rasteve mund të jetë dukshëm më i madh se ai i raportuar.

Kur infeksioni shfaqet në formë të rëndë, ai mund të prekë sistemin nervor dhe të shkaktojë encefalit ose meningjit. Aktualisht nuk ekziston as vaksinë dhe as trajtim kurues për virusin, ndaj mjekët fokusohen vetëm në lehtësimin e simptomave.

OBSH-ja u rekomandon udhëtarëve të marrin masa mbrojtëse ndaj pickimeve, duke përdorur repelentë kundër mushkonjave dhe duke veshur rroba të përshtatshme.