Bozhinovska: Qeveria do të marrë masa për qytetarët nëse përkeqësohet kriza e karburanteve

Ministrja e Energjisë, Minierave dhe Burimeve Minerale, Sanja Bozhinovska, deklaroi se Qeveria do të aktivizojë të gjitha masat e nevojshme për të kufizuar ndikimin te qytetarët, nëse rritja e çmimeve të derivateve të naftës përshkallëzohet.

Gjatë përgjigjeve ndaj pyetjeve të gazetarëve, ajo tha se autoritetet po i ndjekin me kujdes zhvillimet. Sipas Bozhinovskës, shtrenjtimi i karburanteve lidhet me faktorë globalë dhe konflikte ushtarake, mbi të cilat shteti nuk ka ndikim.

Ministrja bëri të ditur se vazhdon të jetë në fuqi masa për uljen e TVSH-së për karburantet, nga 18 në 10 përqind.

Bozhinovska sqaroi se mund të shqyrtohen edhe ulje të tjera, ndërsa masat fiskale hartohen nga Ministria e Financave dhe koordinohen me Qeverinë.

Situata pritet të diskutohet në seancën e ardhshme të Qeverisë, e cila do të zhvillohet të martën, ku do të përcaktohen edhe hapat e mëtejshëm.

Sa i përket kompanisë “Okta”, ajo tha se aktualisht nuk ka negociata të reja për një zbritje shtesë. Megjithatë, kjo mundësi nuk përjashtohet në rast se kriza thellohet.

Ministrja shtoi se deri tani nuk janë nisur bisedime të tilla, por nëse situata përkeqësohet, Qeveria do të ndërmarrë çdo masë për të zbutur rrezikun që u kanoset qytetarëve.