Qeveria hesht për ndërhyrje të reja pas rritjes së çmimit të karburanteve

Për momentin nuk ka asnjë vendim të ri lidhur me shtrenjtimin e naftës. Edhe pse dje ministrja e Energjisë, Sanja Bozhinovska, la të kuptohej se kabineti do të shqyrtonte mundësinë e një ndërhyrjeje shtesë gjatë ditës së sotme, deri tani nuk ka dalë asnjë njoftim zyrtar për hapa konkretë.

Ekzekutivi nuk dha një përgjigje të prerë nëse në mbledhjen e mbajtur u analizuan alternativa të reja për të zbutur këtë rritje. Nga zyra e qeverisë u mjaftuan të rikujtonin se masa e TVSH-së së reduktuar për lëndët djegëse, nga 18 në 10 përqind, vijon të jetë aktive.

“Qeveria po e ndjek me vëmendje dhe në mënyrë permanente ecurinë në tregun e derivateve dhe do të ndërhyjë në mbrojtje të interesave të qytetarëve dhe të ekonomisë”, thuhet në reagimin e shkurtër zyrtar.

Teori që situata është nën monitorim, çmimi i ri tashmë po krijon peshë mbi supet e popullatës dhe bizneseve. Nga dita e sotme, një litër naftë tregtohet me 104.5 denarë. Sipërmarrësit kanë propozuar që në pakon e masave të ardhshme të përfshihen edhe kuponët për karburant.

Lidhja e Sindikatave (LSM) paralajmëron se nafta e shtrenjtë nuk do të ndihet vetëm në momentin e pagesës në pompë, por rrezikon të çojë lart edhe çmimet e artikujve ushqimorë dhe mallrave të tjera. Përfaqësuesi sindikal Ivan Pesevski thekson se kjo rritje e kostove e bën edhe më të ngutshme kërkesën për rishikimin e pagës minimale.

Në harkun e vetëm dy muajve, çmimi i naftës është rritur me mbi dhjetë denarë për litër. Deri tani, ekzekutivi ka ndërhyrë nëpërmjet uljes së akcizës dhe TVSH-së, si dhe arriti më herët një marrëveshje për zbritje me kompaninë OKTA, e cila për momentin nuk është në fuqi. Ministrja Bozhinovska deklaroi një ditë më parë se ende ka hapësirë për masa plotësuese, por shtoi se çdo hap i ri duhet peshuar me kujdes për të vlerësuar impaktin mbi arkën e shtetit.