BDI: Zhvillimet në Kosovë po ndiqen nga afër, UÇK-ja meriton dinjitet dhe respekt institucional

Bashkimi Demokratik për Integrim deklaron se po ndjek me kujdes zhvillimet politike dhe institucionale në Republikën e Kosovës, me theks të veçantë te çështjet që lidhen me mbrojtjen e vlerave të rëndësishme të kombit shqiptar, të dëshmuara ndër breza, njofton shtypi i BDI-së.

Sipas BDI-së, Ushtria Çlirimtare e Kosovës është një prej këtyre vlerave në historinë bashkëkohore shqiptare, ndërsa roli i saj në çlirimin dhe shtetësinë e Kosovës ka qenë përcaktues.

Partia thekson se UÇK-ja është pasuri e përbashkët kombëtare, që u përket të gjithë shqiptarëve dhe që qëndron përtej ndasive partiake, interesave të momentit dhe dallimeve politike. BDI vlerëson se ajo ka bashkuar shqiptarët në çastet më të rëndësishme të historisë së tyre të re, ndaj kontributi i saj duhet trajtuar me përgjegjësi, dinjitet dhe respekt institucional.

BDI u bën thirrje autoriteteve të Republikës së Kosovës të gjejnë një rrugëdalje nga situata, duke mbrojtur vlerat e UÇK-së, dinjitetin e pjesëtarëve të saj dhe interesin e përgjithshëm të vendit.

“Në këtë moment, interesat politike të ditës duhet të zëvendësohen nga interesi kombëtar, uniteti dhe përgjegjësia shtetërore, në mënyrë që të ruhet ajo që UÇK-ja përfaqëson për kombin shqiptar dhe historinë e Kosovës”, thuhet në reagimin e BDI-së.