BDI paralajmëron se deklarata e VLEN-it për dobësinë në qeverisje është një sinjal rreziku për çdo shqiptar

Nga radhët e BDI-së vlerësojnë se pranimi i hapur i përfaqësuesve të VLEN-it se ndodhen “tmerrësisht të dobët” në strukturat qeveritare nuk përbën një justifikim, por një provë të një dështimi të thellë politik.

Sipas kësaj partie, teksa rajoni po shënon përparime, Maqedonia e Veriut po thellohet gjithnjë e më shumë në izolim dhe pozitat politike e institucionale të shqiptarëve po dobësohen çdo ditë e më tepër.

“Përfaqësimi është në tkurrje, gjuha shqipe po margjinalizohet, institucionet po u mbyllen shqiptarëve dhe e gjithë trashëgimia e ndërtuar me vite po vihet në dyshim. VLEN-i nuk mund të fshihet pas fuqisë së OBRM-PDUKM-së. Qytetarët kanë plotësisht të drejtë të ngrenë pyetjen: nëse jeni kaq të pafuqishëm, pse vazhdoni të qëndroni në Qeveri dhe interesave të kujt po i shërben prania juaj aty?”

Po ashtu, BDI thekson se opinioni publik pret përgjigje të argumentuara lidhur me akuzat gjithnjë e më të shumta për përqendrim të ndikimit ekonomik, tenderëve dhe interesave të biznesit rreth rrethit të ngushtë familjar e politik të Izet Mexhitit në Shkup e më gjerë.

“Këto dyshime kërkojnë domosdoshmërisht sqarime transparente dhe institucionale. Ky bashkëveprim i dobësisë politike, degradimit të pozitës së shqiptarëve dhe dyshimeve për përfitime personale është një alarm që duhet të zgjojë çdo qytetar”, përfundojnë nga BDI.