BDI kërkon dorëheqjen e drejtorit të Inspektoratit të Gjuhëve: Ku është mekanizmi që mbron shqipen?

Bashkia e Shkupit ka cenuar rëndë obligimin ligjor për përdorimin e gjuhës shqipe brenda vetëm një dite, e madje dy herë radhazi, sipas akuzave të ngritura nga BDI-ja. Duke kujtuar se kryeqyteti ka status dygjuhësh, ata nënvizojnë se të gjitha institucionet e tij janë të detyruara qartësisht ta përdorin shqipen në komunikimet zyrtare.

Sipas BDI-së, Bashkia e Shkupit po vijon të shpërfillë gjuhën shqipe përpara opinionit publik, reagimeve të qytetarëve dhe para vetë ligjit, duke shfaqur një qëndrim përbuzës ndaj normave ligjore, komunitetit shqiptar dhe natyrës multietnike të qytetit.

“Në këto rrethana, lind pyetja e natyrshme: ku ndodhet Inspektorati për Përdorimin e Gjuhëve? Pikërisht për të regjistruar këto shkelje, për të urdhëruar ndreqjen e tyre dhe për të vendosur sanksione ndaj institucioneve që shmangin zbatimin e ligjit u themelua ky ent. Ngritja e tij kërkoi vite të tëra pune, staf, trajnime dhe burime institucionale. Mirëpo, sot ai është paralizuar nga një drejtor i emëruar prej VLEN-it, i cili hesht para shkeljeve të hapura,” thuhet në reagimin e BDI-së.

Heshtja e këtij inspektorati, theksojnë më tej ata, po inkurajon shkeljen e ligjit dhe po e kthen mospërfshirjen e gjuhës shqipe në një praktikë të përhershme institucionale. BDI kërkon me forcë largimin e menjëhershëm të drejtorit të Inspektoratit për Përdorimin e Gjuhëve; marrjen e përgjegjësisë politike nga VLEN-i, i cili ka uzurpuar dhe bllokuar veprimtarinë e këtij institucioni; si dhe një reagim të menjëhershëm ligjor ndaj të gjithë atyre që dhunojnë Ligjin për Përdorimin e Gjuhëve dhe nxisin ndarje e urrejtje etnike.