BDI akuzon Qeverinë: Mungojnë në shqip procesverbalet e 83 seancave

Bashkimi Demokratik për Integrim ka reaguar për atë që e cilëson si një skandal të ri në Qeverinë e Maqedonisë së Veriut. Sipas partisë, prej afro një viti, procesverbalet e mbledhjeve qeveritare nuk janë publikuar në gjuhën shqipe.

Dokumenti i fundit i këtij lloji që figuron i publikuar në shqip mban datën 19 shtator 2025. Pas kësaj date, Qeveria ka zhvilluar 83 seanca, por procesverbalet përkatëse ende nuk janë të disponueshme në versionin shqip të faqes së saj zyrtare.

Në reagimin e BDI-së theksohet se bëhet fjalë për dokumente zyrtare të institucionit më të lartë të pushtetit ekzekutiv, të cilat mungojnë për një periudhë prej 11 muajsh. Sipas partisë, numri i madh i dokumenteve të papublikuara kërkon një shpjegim të hollësishëm lidhur me zbatimin e Ligjit për Përdorimin e Gjuhëve brenda vetë Qeverisë.

BDI vlerëson se rasti merr përmasa edhe më serioze për faktin se kjo çështje ishte ngritur publikisht edhe më parë. Përfaqësuesit e s’vlen-it, sipas reagimit, kishin deklaruar se procesverbalet mund të gjendeshin edhe në gjuhën shqipe, ndërkohë që sot 83 dokumente të njëpasnjëshme vazhdojnë të jenë të paqasshme në shqip.

Partia dënon atë që e konsideron shpërfillje të detyrimeve ligjore për përdorimin e gjuhës shqipe dhe kërkon që institucionet të mbajnë përgjegjësi.

BDI i kërkon Qeverisë të tregojë publikisht përse këto procesverbale nuk janë botuar, të përcaktojë se kush është përgjegjës për gjendjen e krijuar dhe ta publikojë pa vonesë të gjithë dokumentacionin që mungon në gjuhën shqipe.

Në reagim rikujtohet se Ligji për Përdorimin e Gjuhëve parashikon sanksione për shkeljen e dispozitave të tij. Për këtë arsye, sipas BDI-së, institucionet përkatëse duhet të verifikojnë nëse janë plotësuar kushtet për përgjegjësi në këtë rast dhe të ndërmarrin veprime në përputhje me ligjin.

Partia kërkon gjithashtu që s’Vleni-i t’u japë përgjigje shqiptarëve se si është toleruar vazhdimi i kësaj situate, pa u korrigjuar, gjatë 11 muajve dhe 83 seancave të Qeverisë.

BDI kërkon respektimin e ligjit, nxjerrjen e menjëhershme të procesverbaleve në gjuhën shqipe dhe përcaktimin e përgjegjësisë për këtë skandal. Në reagim thuhet se thirrja drejtuar Inspektoratit për Përdorimin e Gjuhëve për të ndërhyrë tashmë pothuajse nuk ka vlerë, pasi, sipas partisë, s’vlen-i e ka degraduar dhe dobësuar këtë institucion deri në atë masë sa mekanizmi që duhej të ishte ndër mbrojtësit kryesorë të gjuhës shqipe është bërë praktikisht i pafuqishëm.