Aziri paralajmëron: Pa votën e diasporës edhe në zgjedhjet lokale, ligji do të bllokohet

Lidhja Shqiptare ka shprehur qartë qëndrimin e saj lidhur me ndryshimet në Kodin Zgjedhor, duke e lidhur përkrahjen me përfshirjen e së drejtës së diasporës për të votuar edhe në zgjedhjet lokale.

Përmes një deklarate, deputeti i kësaj force politike, Elmi Aziri, theksoi se megjithëse gjatë bisedimeve disamujore kanë qenë konstruktivë dhe të angazhuar për arritjen e konsensusit, ekziston një kufi për të cilin nuk do të bëjnë lëshime.

“Gjatë takimeve disa mujorëshe mes partive për Kodin Zgjedhor, Lidhja Shqiptare kishte propozimet e saja edhe për njësitë zgjedhore, edhe për modelin e financimit edhe për shumë çështje tjera! Por ne ishim në funksion të konsensusit! Ajo për të cilën ne nuk heqim dorë është mundësia e votimit të diasporës edhe në zgjedhjet lokale! Është shumë e thjeshtë!”, ka deklaruar Aziri.

Aziri u ka përcjellë një sinjal të qartë partive të tjera politike, duke paralajmëruar bllokim të plotë të procesit në rast se kjo kërkesë nuk merret parasysh./INA/