Arrestohet 52-vjeçari nga Struga pas fyerjeve ndaj kryeministrit Mickoski

S.G., 52 vjeç, nga Struga, është arrestuar pasi gjatë vizitës së kryeministrit Hristijan Mickoski në Tashmarunishtë, më 2 Gusht, dyshohet se ka drejtuar fyerje verbale. Lajmi u bë i ditur nga Ministria e Punëve të Brendshme, ndërsa VMRO-DPMNE deklaroi se personi i ndaluar posedonte dokumente bullgare.

Arrestimi erdhi pas kallëzimit për veprën penale “pengim i personit zyrtar gjatë kryerjes së detyrës zyrtare”, transmeton portali Lideri.mk.

Sipas njoftimit të MPB-së, ngjarja ndodhi më 2 gusht, kur S.G. dyshohet se ka fyer personat publikë që ndodheshin në aktivitetin e organizuar për shënimin e 2 Gushtit – Ditës së Republikës. Autoritetet thanë se, pas përfundimit të dokumentimit të rastit, ndaj tij do të dorëzohet kallëzimi përkatës.

Incidenti u komentua një ditë më parë edhe nga LSDM-ja dhe VMRO-DPMNE-ja.

LSDM-ja kërkoi të dijë nëse qytetarët e kishin sulmuar verbalisht Mickoskin dhe nëse fyerjet kishin ardhur si pasojë e premtimeve të pambajtura. Sipas kësaj partie, politika e kryeministrit për përhapjen e urrejtjes, përçarjes dhe ndasive, e shfaqur edhe në fjalimin e tij për Ilindenin, ka bërë që qytetarët të mos e durojnë më. LSDM-ja e lidhi pakënaqësinë e madhe të qytetarëve me gjendjen katastrofike ekonomike, ndotjen e ujit, izolimin e vendit dhe gënjeshtrat e përditshme të Mickoskit.

VMRO-DPMNE iu përgjigj LSDM-së duke deklaruar se kjo parti e kishte gjetur veten në fjalimin e Mickoskit në Pelincë dhe se kishte dëshmuar koordinimin e plotë me qendra të jashtme.

Partia në pushtet tha se kryeministri, i përshëndetur nga qytetarët, po ecte mes tyre në mënyrën që i përshtatet një lideri popullor, ndryshe nga kryetari i LSDM-së, i cili, sipas saj, u shmanget qytetarëve duke përdorur jahte të shtrenjta dhe u drejtohet atyre përmes mesazheve të regjistruara edhe në një ditë si Ilindeni.

VMRO-DPMNE pretendoi gjithashtu se, gjatë lëvizjes së Mickoskit mes qytetarëve, një person nën ndikimin e alkoolit po bërtiste fjalë të papërshtatshme me synimin për të shkaktuar incident. Sipas partisë, qytetarët e pranishëm e izoluan personin, ndërsa pjesëtarët e MPB-së e identifikuan. Gjatë procedurës së identifikimit, ai paraqiti letërnjoftim dhe pasaportë bullgare.