Andonovski: Aplikacioni m.Shërbime do t’i vendosë dokumentet e qytetarëve në telefon

Ministri i Transformimit Dixhital, Stefan Andonovski, njoftoi se aplikacioni m.Shërbime do t’u mundësojë qytetarëve të ruajnë në mënyrë elektronike, në telefonin e tyre celular, letërnjoftimin, patentën e shoferit dhe dokumente të tjera.

Duke folur për “360 shkallë”, Andonovski tha se versioni demo i aplikacionit u prezantua një vit më parë në Samitin Dixhital të Ballkanit Perëndimor në Shkup. Prej atëherë, m.Shërbime është testuar nga disa mijëra qytetarë, ndërsa ekipi ka marrë mbi 200 komente. Analiza e kryer më pas evidentoi disa elemente të funksionalitetit që kërkonin përmirësim.

Sipas tij, një hap tjetër i rëndësishëm ishte arritja e marrëveshjes për një protokoll të shkëmbimit të të dhënave me Ministrinë e Brendshme. Ky institucion shërben si burim për të dhënat që lidhen me letërnjoftimet dhe patentat e shoferit.

Ministri nënvizoi se përfshirja e letërnjoftimit dhe patentës së shoferit përbën vetëm fazën e parë të zhvillimit të aplikacionit.

Synimi, shpjegoi Andonovski, është që m.Shërbime të shndërrohet në një super aplikacion dhe portofol dixhital, ku qytetarët të kenë në një vend edhe dokumente të tjera që përdorin shpesh, përfshirë certifikatat dhe diplomat./Telegrafi/