Agon Ferati në Tiranë: Partneritetet ekonomike mund t’i shndërrojnë ndarjet e Ballkanit në mundësi zhvillimi të përbashkët

Agon Ferati, ministër për Marrëdhënie ndërmjet Bashkësive, mori pjesë në Balkan Business Forum, që u zhvillua në Tiranë, ku nënvizoi rolin e bashkëpunimit ekonomik në forcimin e raporteve rajonale, hapjen e perspektivave të reja dhe krijimin e një vizioni të përbashkët për të ardhmen e vendeve të Ballkanit.

Gjatë adresimit të tij para pjesëmarrësve, Ferati tha se lidhjet ekonomike sjellin përfitime për të gjitha palët. Sipas tij, rajoni duhet të mobilizojë potencialin e vet duke u mbështetur te partneritetet dhe interesat që bashkojnë vendet.

“Bashkëpunimi ekonomik nuk prodhon humbës, por vetëm fitues. Perceptimi për Ballkanin po ndryshon: ai nuk shihet më vetëm si një rajon i përshkuar nga përplasjet dhe mosmarrëveshjet historike, por si një hapësirë me mundësi, zhvillim të përbashkët dhe një model të ri bashkëpunimi mes njerëzve dhe shoqërive të rajonit”, deklaroi Ferati.

Mesazhi i ministrit u përqendrua te nevoja për të lënë pas ndasitë e së kaluarës dhe për të ndërtuar marrëdhënie të qëndrueshme përmes dialogut, bashkëpunimit dhe projekteve që gjenerojnë vlerë për të gjithë.

Balkan Business Forum në Tiranë është një platformë ku aktorët ekonomikë dhe institucionalë të rajonit shkëmbejnë ide dhe thellojnë lidhjet mes tyre, me synimin për të nxitur zhvillimin dhe për të hapur mundësi të reja bashkëpunimi në Ballkan.