Afrim Gashi: Vendimi ndaj ish-drejtuesve të UÇK-së nuk e mbyll përpjekjen për drejtësi

Kryetari i Kuvendit të Maqedonisë së Veriut, Afrim Gashi, ka reaguar pas vendimit të Gjykatës Speciale në Hagë për ish-krerët e Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi.

Sipas Gashit, aktgjykimi nuk mund ta ndryshojë vendin që katër ish-drejtuesit e UÇK-së zënë në historinë e Kosovës. Ai i ka cilësuar ata si pjesë të një kapitulli të lavdishëm, në një periudhë kur liria e Kosovës, paqja dhe stabiliteti në rajon ishin synime për të cilat duhej luftuar.

Gashi ka theksuar se Thaçi, Krasniqi, Veseli dhe Selimi morën përsipër përgjegjësi historike dhe patën guximin të angazhoheshin për ta sjellë lirinë te populli i tyre. Ai shtoi se, për shqiptarët, ata vazhdojnë të konsiderohen çlirimtarë të Kosovës.

Në reagimin e tij, kryetari i Kuvendit maqedonas e përshkroi luftën e UÇK-së, sakrificën dhe vetëmohimin e pjesëtarëve dhe drejtuesve të saj si rrugën që çoi në lirinë e Kosovës dhe në një periudhë të re paqeje e stabiliteti në rajon. Ai nënvizoi gjithashtu se vendimi i shpallur sot është i shkallës së parë dhe se përpjekja për drejtësi nuk ka përfunduar.

Gashi u bëri thirrje qytetarëve që të qëndrojnë të bashkuar, me qetësi dhe dinjitet, duke shprehur mbështetjen e tyre për çlirimtarët dhe familjet e tyre. Ai tha se Kosova e lirë ishte beteja më e vështirë, të cilën ata e fituan, ndërsa kujtesa e atij brezi që guxoi të ëndërronte lirinë duhet të shërbejë si forcë përballë vendimit të sotëm dhe sfidave të ardhshme, ka shkruar Gashi./Telegrafi/