Analizë e re: Konsumi i mishit të kuq shoqërohet me rritjen e rrezikut për kancer të pankreasit

Konsumimi i rregullt i sasive të mëdha të mishit të kuq mund të lidhet me një mundësi më të lartë për zhvillimin e kancerit të pankreasit.

Në këtë përfundim orienton një analizë e re e botuar në revistën shkencore Frontiers in Nutrition, ku u shqyrtuan të dhënat e 16 studimeve që përfshinin afro dy milionë pjesëmarrës.

Qëllimi i studiuesve ishte të vlerësonin nëse konsumi i mishit të kuq dhe atij të përpunuar kishte lidhje me diagnostikimin e mëvonshëm të kancerit të pankreasit.

Rezultatet treguan se pjesëmarrësit me konsumin më të lartë të mishit të kuq kishin një rrezik relativ 16% më të madh për këtë sëmundje sesa ata që konsumonin sasitë më të vogla.

Të dhënat evidentuan gjithashtu një marrëdhënie lineare: shtimi i sasisë së mishit të kuq në ushqyerje shoqërohej me rritje të mëtejshme të rrezikut.

Konkretisht, për çdo 100 gramë mish të kuq të konsumuar më shumë në ditë, rreziku relativ për kancer të pankreasit shtohej me 10 për qind.

Pavarësisht kësaj prirjeje, kërkuesit nuk përcaktuan ndonjë kufi të veçantë konsumi, pas të cilit rreziku të shënonte një rritje të menjëhershme.

Përfundime të ndryshme dolën për produktet e mishit të përpunuar, përfshirë sallamet, salsiçet dhe artikuj të tjerë të ngjashëm.

Shqyrtimi i 11 studimeve nuk evidentoi ndonjë lidhje statistikisht domethënëse ndërmjet konsumit të mishit të përpunuar dhe kancerit të pankreasit, pavarësisht sasive të konsumuara.

Hulumtimi i ri u shtohet rezultateve të raportuara më herët. Një meta-analizë e publikuar sivjet, e mbështetur në të dhënat e mbi 1.8 milionë personave, kishte treguar se vegjetarianët përballen me rreth 21 për qind rrezik më të ulët për kancer të pankreasit krahasuar me konsumuesit e mishit.

Autorët paralajmërojnë, megjithatë, se këto rezultate kërkojnë interpretim të kujdesshëm.

Pjesa më e madhe e të dhënave është mbledhur në Evropë dhe në Shtetet e Bashkuara të Amerikës. Po ashtu, studimet e përfshira kanë qenë kryesisht vëzhguese dhe janë mbështetur në pyetësorë për zakonet e të ushqyerit.

Studime të kësaj natyre mund të evidentojnë një lidhje, por nuk dëshmojnë se mishi i kuq është shkaktar i drejtpërdrejtë i kancerit të pankreasit. Përveç kësaj, mes studimeve të shqyrtuara kishte dallime të konsiderueshme.