Analizë e re: Konsumi i lartë i mishit të kuq shoqërohet me rrezik më të madh për kancerin e pankreasit

Një studim i ri sugjeron se njerëzit që hanë rregullisht sasi të mëdha mishi të kuq mund të përballen me një rrezik më të lartë për zhvillimin e kancerit të pankreasit.

Analiza, e publikuar në revistën shkencore Frontiers in Nutrition, shqyrtoi të dhënat e 16 studimeve ku morën pjesë afro dy milionë persona.

Hulumtuesit kërkuan të përcaktonin nëse konsumi i mishit të kuq dhe atij të përpunuar lidhej me shfaqjen e mëvonshme të kancerit të pankreasit.

Sipas përfundimeve, pjesëmarrësit që konsumonin më shumë mish të kuq kishin një rrezik relativ 16% më të lartë për t’u prekur nga kjo sëmundje, në krahasim me ata që konsumonin sasi më të vogla.

Rezultatet treguan gjithashtu një marrëdhënie lineare: rreziku rritej në përpjesëtim me sasinë e mishit të kuq të konsumuar.

Çdo 100 gramë shtesë mish të kuq në ditë shoqërohej me një rritje prej 10 për qind të rrezikut relativ për kancerin e pankreasit.

Megjithatë, studiuesit nuk përcaktuan një nivel të veçantë konsumi pas të cilit rreziku do të rritej në mënyrë të menjëhershme.

Gjetjet ishin të ndryshme për mishin e përpunuar, ku përfshihen sallamet, salsiçet dhe produkte të ngjashme.

Në shqyrtimin e 11 studimeve nuk u evidentua një lidhje statistikisht domethënëse mes konsumit të mishit të përpunuar dhe kancerit të pankreasit, pavarësisht sasisë së konsumuar.

Rezultatet e reja janë në linjë me disa të dhëna të mëparshme. Një meta-analizë e publikuar sivjet, e cila përfshinte mbi 1.8 milionë persona, kishte arritur në përfundimin se vegjetarianët kishin rreth 21 për qind më pak rrezik për t’u prekur nga kanceri i pankreasit sesa njerëzit që konsumojnë mish.

Autorët, megjithatë, bëjnë thirrje që këto përfundime të vlerësohen me kujdes.

Pjesa më e madhe e të dhënave është mbledhur në Evropë dhe në Shtetet e Bashkuara të Amerikës. Për më tepër, studimet e përfshira ishin kryesisht vëzhguese dhe mbështeteshin në pyetësorë rreth zakoneve të ushqyerjes.

Studime të tilla mund të evidentojnë një lidhje, por nuk dëshmojnë se mishi i kuq është shkaku i drejtpërdrejtë i kancerit të pankreasit. Gjithashtu, analizat e shqyrtuara ndryshonin ndjeshëm nga njëra-tjetra.