A i bën zgjimi i hershëm njerëzit më të lumtur dhe më efikasë?

Një zakon që në fillim mund të duket i mundimshëm, me kalimin e kohës mund të sjellë më shumë qetësi, energji dhe ndjenjë kontrolli gjatë ditës

Nëse sot jeni ngritur vetëm pasi keni shtyrë disa herë alarmin e telefonit dhe nuk jeni kthjelluar dot pa pirë një filxhan kafe, atëherë njerëzit që çohen sapo bie alarmi, konsumojnë pije të freskëta, ushtrohen dhe hanë mëngjes para punës mund t’ju duken thuajse si nga një botë tjetër.

Ndonëse të rriturit kanë nevojë afërsisht për shtatë orë gjumë, jo të gjithë e nisin mëngjesin njësoj. Disa ngrihen në minutën e fundit vetëm për të mos u vonuar në punë dhe dita u fillon me nxitim e rrëmujë. Të tjerë zgjedhin të zgjohen shumë më herët dhe, pa stres, kryejnë disa veprime para se të nisë orari i punës.

Por a janë vërtet më të lumtur, më të shëndetshëm dhe më produktivë ata që njihen si njerëz të mëngjesit? Sipas shumë studimeve shkencore, përgjigjja është po. Një studim i botuar së fundmi në revistën Journal of Sleep Medicine ka treguar se personat që zgjohen herët përjetojnë më rrallë stres dhe janë më të lumtur.

Po ashtu, është vërtetuar se këta persona janë më produktivë në punë dhe zakonisht nuk përballen me rënie të energjisë në fund të orarit. Për më tepër, ata kanë më pak dëshirë për ushqime me shumë kalori, irritohen më pak dhe gëzojnë një sistem imunitar më të fortë. Me pak fjalë, ka mjaft arsye pse zgjimi herët ia vlen, transmeton Telegrafi.

Si të bëheni tip i mëngjesit?

Nëse keni tentuar më parë të ngriheni më herët dhe të mos përdorni butonin e shtyrjes së alarmit, atëherë e dini se nuk është aspak e thjeshtë. Mund të ketë ndodhur që për disa ditë të ngriheni në kohë falë motivimit për të ndryshuar zakonet e gjumit, por më pas të jeni rikthyer sërish te rutina e vjetër.

Pikërisht për këtë, ndryshimet duhet të jenë të vogla dhe të qëndrueshme, në mënyrë që rutina e re e gjumit të mos braktiset shpejt.

Para së gjithash, zgjimi i hershëm ka kuptim vetëm kur paraprihet nga gjumë i mjaftueshëm. Kjo nënkupton se hapi i parë është të shkoni në shtrat në kohë. Edhe pse në teori duket e lehtë, në praktikë shpesh ndodh që të kaloni kohë duke u rrotulluar në shtrat pa ju zënë gjumi. Megjithatë, ekzistojnë disa rutina që mund t’ju ndihmojnë të flini më herët.

Truri ynë funksionon mirë me zakone të përsëritura, ndaj veshja e pizhameve dhe larja e dhëmbëve çdo mbrëmje në të njëjtën orë janë sinjale të mira se është koha për të fjetur. Ndër hapat e tjerë që mund të ndërmerrni janë: darka rreth orës 18:00 dhe mosngrënia pas saj, shmangia e kafeinës gjatë pasdites, mos përdorimi i telefonit 30 deri në 60 minuta para gjumit, si edhe zbehja e dritave në shtëpi, pasi ndriçimi i fortë mund të pengojë prodhimin natyror të melatoninës në trup.

Derisa regjimi i ri i gjumit të marrë formë të qëndrueshme, këshillohet të shmangni edhe gjumin e pasdites.

Nëse i keni provuar të gjithë këta hapa dhe sërish nuk po ju zë gjumi, mos qëndroni në shtrat duke u rrotulluar për më shumë se 20 minuta. Pasi të kalojë kjo kohë, ngrihuni dhe bëni diçka qetësuese – lexoni një libër, praktikoni joga relaksuese ose bëni disa shtrirje të lehta. Mos e merrni telefonin në dorë dhe mos hani, sepse kështu vetëm sa do të zgjoheni edhe më shumë.

Qëndrueshmëria është më e rëndësishmja

Në gjithë këtë proces, elementi kryesor është vazhdimësia. Netët e para mund të jenë të vështira dhe mund të keni probleme me gjumin, por nëse i mbani rregullisht zakonet e mbrëmjes, trupi juaj do të përshtatet shpejt me ritmin e ri.

Ndryshimet e forta nuk janë zgjidhja e duhur. Fillimisht, lëvizeni orarin e gjumit me një orë më herët, pastaj pas një ose dy javësh shtoni edhe një orë tjetër, derisa të arrini objektivin që i keni vendosur vetes.

Gjatë këtij rrugëtimi, tregohuni të duruar me veten dhe mos e qortoni veten nëse ndonjë natë flini më vonë se sa kishit planifikuar. Mbani parasysh se përjashtimet ekzistojnë për ta vërtetuar rregullin.

Këshilla e fundit

Për të mos hequr dorë nga asnjë synim, përfshirë edhe dëshirën për t’u bërë njeri që zgjohet herët, është thelbësore të keni një arsye të fortë dhe ta ushqeni rregullisht motivimin.

Prandaj, mendoni si do të ndryshonte jeta juaj nëse do ta nisnit ditën më herët. Shënoni të gjitha përfitimet që do të fitonit dhe rikthehuni te kjo listë sa herë që ndjeni tundimin për të hequr dorë. Kjo do t’ju ndihmojë të qëndroni të vendosur në arritjen e synimit tuaj. /Telegrafi/