Tre turistë të huaj dhe një shtetas shqiptar janë përfshirë në një sherr të dhunshëm mbrëmjen e djeshme në Sarandë.
Tre turistë francezë dhe një shqiptar, që ishte palë me njërin prej të huajve janë konfliktuar mes tyre në ambientet e një hoteli në qytetin e Sarandës, duke shkaktuar moment kaotike dhe dëme të shumta materiale.
Policia pasi zbardhi rrethanat e ngjarjes ka arrestuar si Laurent Ishmi, 19 vjeç dhe shtetasin francez Dylan Tahoundjona 19 vjeç.
“Këta dy persona, për motive të dobëta, në ambientet e një hoteli në lagjen nr. 2, Sarandë, janë konfliktuar fizikisht me dy shtetas të tjerë francezë, duke prishur qetësinë publike dhe duke shkaktuar dëme materiale në ambientet e hotelit”, njoftoi policia vendore.
Mbeten të panjohura shkaqet e sherrit mes tre francezëve dhe shqiptarit, teksa hetimet po ndiqen edhe nga prokuroria vendore, me akuzat dëmtime me dashje, shkatërrim prone dhe prishje e qetësisë publike, në bashkëpunim.
