Zjarri në Delvinë vijon aktiv prej disa orësh, ndërsa ka shkrumbuar sipërfaqe të gjera me kullota në zonën e luginës së Kalasës.
Sipas raportimeve, era e fortë që fryn po favorizon përhapjen e flakëve që tashmë kanë përfshirë disa plantacione me drurë frutorë dhe janë duke iu afruar rrezikshëm masiveve me ullinj në afërsi të fshatit Fushë-Vërri. Një nga drejtimet e përhapjes së zjarrit është faqja e malit të Gjerë, drejt qafës së Skërficës, pranë rrugës nacionale Kardhiq–Delvinë, ndërsa një tjetër krah i flakëve po avancon drejt jugut.
Ndërhyrja e zjarrfikësve nga toka është e vështirë për shkak të terrenit kodrinor dhe malor, dhe për këtë arsye dy helikopterë po punojnë për fikjen e zjarrit nga ajri.
Dhjetëra forca zjarrfikëse janë në terren, dhe gjithashtu është kërkuar edhe ndihma e banorëve të fshatrave Kalasë, Tatzat, Fushë-Vërri dhe Vanë për vënien nën kontroll të situatës. Dyshohet se zjarri është ndezur qëllimisht ndërsa po zhvillohen hetime lidhur më këtë.
