Ministria e Bujqësisë së Turqisë njoftoi të enjten se “Schoko Bons”, një produkt çokollatë i markës Kinder, do të tërhiqet pjesërisht nga tregu turk pas raportimeve për një shpërthim salmonele në vezët “Kinder Surprise” të prodhuara në Evropë. Kjo tërheqje përfshin vetëm ato me datë skadimi 8 korrik 2022 dhe 15 korrik 2022.
Ministria u shpreh në një deklaratë se salmonela nuk është gjetur deri më tani në produktet Kinder në Turqi dhe se po monitoronin me përpikëri procesin dhe po kryenin inspektimet e nevojshme të produkteve të importuara.
Ferrero Turkey, e cila importon vezët plastike të mbuluara me çokollatë, tha më herët se nuk kishte asnjë rrezik në importet nga Evropa deri më tani, por produktet do t’i nënshtroheshin një kontrolli të rreptë.
Ajo kishte deklaruar më parë se vetëm një model vezësh, Surprise Maxi, ishte importuar nga uzina belge e kompanisë nga e kishin origjinën rastet e salmonelës dhe se vezët aktualisht në tregun turk nuk janë prodhuar në datat që lidhen me rastet e salmonelës, por do të tërhiqen si masë sigurie./albeu.com
