Turqia ka drejtuar gishtin nga kurdët për sulmin që ndodhi në Stamboll ku humbën jetën 6 persona dhe mbetën të plagosur 81 të tjerë. Profesori i kriminalistikës Ervin Karamuço, i ftuar të premten në “Log” me Endri Xhafon tha se edhe Shqipëria është e rrezikuar nga kurdët.
Karamuço shpjegoi se ata stërviten në kampe për të luftuar ISIS, por mund të infiltrohen edhe nga krahu tjetër. Ata, sipas profesorit, janë një nga kontribuesit më të mëdhenj në trafikimin e qenieve njerëzore, që po organizojnë emigracionin e shqiptar në Britaninë e Madhe.
“Ato çadrat në Francë i japin me qira kurdët, dhe aty në Angli janë po kurdët që i presin. Një pjesë e parave i mbajnë për t’u pasurar, një pjesë për t’u fuqizuar.”
Ervin Karamuço tregoi po ashtu se autoritetet shqiptare kanë kapur njerëz të stërvitur nga inteligjenca të ndryshme, në pika kufitare si Kapshtica, Morina, Kakavija dhe dy prej tyre janë deportuar.
“Rreziku është i madh, sepse ata sjellin në vendin tonë jo vetëm kurdë por edhe njerëz të tjerë nga vende që janë në konflikt.. tani është bërë tokësore, dhe po e bëjnë këta njerëz që janë të lidhur me çështje të terrorizmit.”
Autoritetet shqiptare, thotë Karamuço, janë në Bashkëpunim të fortë me shërbimet inteligjentë turke por edhe me ato arabe.
