Mbetjet e një njeriu që u zhduk në 18 shkurt duket se janë gjetur brenda një peshkaqeni.
Diego Barria, një 32-vjeçar, baba i tre fëmijëve, u pa për herë të fundit duke hipur në automjetin e tij pranë brigjeve të provincës jugore Chubut të Argjentinës më 18 shkurt.
Të dielën herët në mëngjes, dy peshkatarë i raportuan rojës bregdetare lokale se kishin kapur tre peshkaqenë afër vendit ku ishte gjetur automjeti i zotit Barria.
Daniela Millatruz, oficerja e zbatimit të ligjit që ishte përgjegjëse për kërkimin e tij, tha për mediat lokale se peshkatarët kishin thënë “kur po pastronin (peshkaqenët) gjetën mbetje njerëzore në një prej tyre”
Familja e Barria e njohu atë “për shkak të një tatuazhi që u shfaq në njërën prej atyre mbetjeve”, shtoi ajo, megjithëse do t’i nënshtrohen gjithashtu testit të ADN-së për të konfirmuar identitetin e tij.
Nuk është e qartë se çfarë ndodhi, por hetimet vazhdojnë – automjeti i dëmtuar i zotit Barria u gjet në një plazh pranë Rocas Coloradas dy ditë pasi ai u zhduk.
Zonja Millatruz tha: “Ne supozojmë se Diego ka pasur një aksident dhe ne po hetojmë nëse ka pasur një automjet të përfshirë.”
Cristian Ansaldo, i cili drejton departamentin e policisë në qytetin e Comodoro Rivadavia, tha se peshkaqeni ishte rreth 1.5 metra dhe ka të ngjarë që zoti Barria “pati një aksident dhe u tërhoq zvarrë”.
Ai tha se kishte pasur një valë të fortë baticash në fundjavën që zoti Barria ishte zhdukur./Albeu.com/
