Gjatë vizitës së sotme në Pogradec, në një prononcim për gazetarët, ish-kryeministri i vendit Sali Berisha, ka reaguar nga qyteti i Pogradecit, lidhur me dosjen Xibraka që SPAK përfundoi hetimet ditën e djeshme duke deklaruar se Olsi Rama, i akuzuar nga Gazment Bardhi si i përfshirë në laboratorin e drogës, nuk ka lidhje me këtë çështje.
Berisha u shpreh se SPAK ka treguar se është vetë pjesë e dosjes “Xibraka”.
Gjtihashtu, lideri demokrat tha se tashmë jo vetëm vëllai i kryeministri, Olsi Rama, por dhe vetë kreu i Strukturës së Posaçme është pjesë e këtij laboratori droge.
“Me deklaratën e tij dje, SPAK tregoi se është pjesë e dosjes Xibraka. Kaq mund të them, tregoi se tani nuk kemi vetëm Olsin, por kemi edhe Dumanin anëtar të bandës së Xibrakës”, u shpreh Berisha.
Kujtojmë që SPAK mbylli ditën e djeshme hetimet për dosjen Xibraka, të rinisura disa muaj me parë pas administrimit të një informacioni të dërguar nga kreu i grupit parlamentar Gazment Bardhi, i cili pretendoi përfshirjen e shtetasit, Olsi Rama në veprimtari të paligjshme.
Në përfundim të hetimeve rezulton se nuk është gjetur asnjë provë që implikon në këtë çështje Olsi Ramën, vëllain e kryeministrit Edi Rama.
Përveç personave të cilët janë dënuar më parë, nuk janë identifikuar autorë të tjerë të mundshëm për veprat penale në fjalë.
