Një ngjarje e pazakontë ka ndodhur në Gjermani, ku sërish vëmendjen e ka rrëmbyer veprimi i një shqiptari.
Sipas mediave gjermane një 21-vjeçar shqiptar ka rrëmbyer në Osnabruk ish-të dashurën e tij 19-vjeçare, duke e tërhequr me forcë në rrugë, dhe më pas e ka futur në makinë duke u larguar me shpejtësi.
Mediat gjermane theksojnë se kanë qenë miqtë e 19-vjeçares të cilët kanë lajmëruar menjëherë policinë.
Më tej theksohet se 21-vjeçari kishte si qëllim që ish-të dashurën e tij ta sillte në Shqipëri.
“Janë vizituar dhe marrë në pyetje dëshmitarët, të afërmit dhe personat e afërt dhe të kontaktuar nga i dyshuari dhe viktima”, tha policia e Osnabruk.
Ndërkohë, të shtunën vonë pasdite, 19-vjeçarja ka telefonuar nga Holanda dhe i tregoi një dëshmitari se do të ktheheshin në Osnabruk.
Por, në mbrëmje, efektivët gjetën mjetin që po kërkonin dhe arritën të arrestonin 21-vjeçarin, i cili ka heshtur gjatë kohës që është tentuar t’i merret dëshmia për ngjarjen.
19-vjeçarja ndodhej gjithashtu në makinë dhe sipas policisë ajo nuk kishte dëmtime fizike ose shenja dhune.
Ish i dashuri i saj akuzohet për heqje lirie, shtrëngim, lëndim të thjeshtë trupor dhe dyshohet se ka drejtuar mjetin pa patentë. 21-vjeçari u la i lirë por mbetet në hetim dhe i është ndaluar nga policia që të kontaktojë sërish me ish të dashurën.
“Nuk kishte më arsye për ndalim, 21-vjeçari u lirua nga masat policore”, tha policia e Osnabrukut./albeu.com/
