Policia ka shkatërruar një “shtëpi bari” në Shijak. Tre persona të cilët e kishin kthyer banesën e tyre në “shtëpi bari” duke kultivuar lëndë narkotike në Shijak, janë shpallur në kërkim nga policia.
Bëhet fjalë për Valter Greca 32 vjeç, Andi Dashi (Greca) 27 vjeç dhe Idajet Greca, 40 vjeç. Ata janë shpallur në kërkim, pasi gjatë kontrollit të ushtruar nga shërbimet e Policisë në banesën e 27-vjeçarit, ata kishin montuar aparatura që shërbejnë për kultivimin e bimëve narkotike, dhe kanë ndërhyrë në matësin e energjisë elektrike.
Për këtë u arrestuan edhe dy elektriçistë të OSHEE-së, Ervin Stafa dhe Xhavit Istrefi, të cilët nuk raportuan vjedhjen.
Njoftimi i policisë:
Goditet një tjetër rast i tentativës për kultivim të bimëve.
Përshtatën banesën për kultivimin e bimëve narkotike, shpallen në kërkim 3 autorët e dyshuar.
Arrestohen në flagrancë 2 punonjës të OSHEE, pasi nuk konstatuan vjedhjen e energjisë elektrike.
Në vijim të kontrolleve të pandërprera dhe punës për parandalimin e kultivimit të bimëve narkotike, në bazë të informacioneve të marra në rrugë operative, specialistët për Hetimin e Krimeve në Komisariatin e Policisë Shijak, bënë shpalljen në kërkim për veprat penale “Kultivim të bimëve narlotike”, “Shpërdorim detyre” dhe “Vjedhje të energjisë elektrike”, të shtetasëve:
G., 32 vjeç, A. D. (G)., 27 vjeç, të dy banues në Hardhishtë, Shijak.
Gjithashtu është shpallur në kërkim shtetasi I. G., 40 vjeç, banues në Hardhishtë, Shijak, me detyrë elektricist pranë OSHEE-së, pasi dyshohet se është bashkautor në kultivimin e bimëve narkotike.
Shpallja në kërkim e këtyre shtetasve u bë pasi gjatë kontrollit të ushtruar nga shërbimet e Policisë në banesën e shtetasit A.D.(G)., në fshatin Hardhishtë, dyshohet se këta shtetas në bashkëpunim me njëri-tjetrin, kanë përshtatur banesën me aparatura që shërbejnë për kultivimin e bimëve narkotike, dhe kanë ndërhyrë në matësin e energjisë elektrike.
Në cilësinë e provës materiale u sekuestruan bimë të lëndës narkotike canabis sativa dhe paisjeve që shërbenin për kultivimin e tyre.
Në vijim të veprimeve u arrestuan në flagrancë për veprën penale “Shpërdorim detyre”, shtetasit E. S., 39 vjeç dhe Xh. I., 25 vjeç, banues në Shetel dhe Romanat, me detyrë faturist dhe elektiçist pranë OSHEE-së.
Të dy këta shtetas, në kundërshtim me ligjin nuk kanë përmbushur detyrën (duke mos kontrrolluar linjën elektrike, si dhe matësin e energjisë elektrike).
Materialet i kaluan Prokurorisë së Rrethit Gjyqësor Durrës, për veprime të mëtejshme. /albeu.com/
