Ditën e sotme në komunën shqiptare të Tuzit në Mal të Zi po mbahen zgjedhjet e pjesshme lokale.
Qytetarët do të zgjedhin mes katër koalicioneve dhe tre listave të pavarura. Procesi i votimit do të jetë i hapur deri në orën 20:00 të mbrëmjes.
Sipas ministrisë së Brendshme të Malit të Zi, 12.387 persona kanë të drejtën e votimit.
Alternativa Shqiptare e kryetarit aktual të Tuzit, Nik Gjeloshaj, është bashkuar me Lidhjen Demokratike të Shqiptarëve, Unionin Kombëtar Shqiptar dhe Lidhjen Demokratike të Malit të Zi nën emrin “Forumi Shqiptar”.
Në krahun tjetër është koalicioni nga Partia Demokratike Socialiste, e presidentit aktual Milo Gjukanoviq, Socialdemokratët, Partia Boshnjake dhe Unioni Demokratik i Shqiptarëve, shkruan Zëri i Amerikës.
Që prej vitit 2018, kjo është hera e dytë që mbahen zgjedhjet lokale që nga ndarja e kësaj komune nga komuna e Podgoricës. Gjatë ditës së sotme do të jenë të hapura 30 vendvotime.
