Në raportin e Departamentit Amerikan të Shtetit thuget se “Shqipëria përmbush kërkesat minimale në lidhje me transparencën fiskale për vitin 2021”, duke e bërë të renditet në mes të 74 vendeve që kanë plotësuar këto kërkesa minimale.
“Departamenti arriti në përfundimin se, nga 141 qeveri të vlerësuara, 74 plotësonin kërkesat minimale të transparencës fiskale. Dy qeveri, Nigeria dhe Gambia, plotësuan kërkesat minimale në 2021 pasi nuk plotësuan këto kërkesa në vitin 2020. Gjashtëdhjetë e shtatë qeveri nuk i plotësuan kërkesat minimale të transparencës fiskale. Megjithatë, nga këto 67, 17 qeveri kanë bërë përparim të dukshëm drejt përmbushjes së kërkesave minimale të transparencës fiskale”, thuhet ndër të tjera në raport.
Transparenca Fiskale
Transparenca fiskale informon qytetarët se si shpenzohen të ardhurat e qeverisë dhe të ardhurat nga taksat. Ky është një element kritik i menaxhimit efektiv të financave publike. Transparenca u siguron qytetarëve një dritare në buxhetet qeveritare dhe ndihmon që qeveritë të japin llogari. Ndihmon në ndërtimin e besimit dhe qëndrueshmërisë së tregut. Raporti i Transparencës Fiskale i mandatuar nga Kongresi është një mjet për të identifikuar mangësitë dhe për të mbështetur ndryshimet e nevojshme./albeu.com
