Parku Fotovoltaik “Blue 1”, në Fier, me kapacitet 50 MW është vënë në funksion të plotë që prej muajit maj të vitit të kaluar, në përmbushje të politikave të ndërmarra nga qeveria për diversifikimin e burimeve të rinovueshme.
Ky rajon përfiton nga niveli i lartë i rrezatimit diellor, duke e bërë atë një vend ideal për prodhimin e energjisë diellore.
“Blue 1” është impianti më i madh fotovoltaik privat në rajon që shtrihet në një sipërfaqe prej 78 hektarësh dhe është i pajisur me teknologji diellore të avancuar: Panele Bifacial dual-glass monocrystalline (665W) dhe ”Trackers” me një bosht, të cilët lejojnë që paneli të ndjekë diellin ndërsa lëviz nga lindja në perëndim.
Që nga fillimi i funksionimit të tij në maj 2024, deri më sot, impianti ka injektuar me sukses në rrjet 77 mijë MWh. Energjia e prodhuar tregtohet në treg të lirë nga vetë prodhuesi.
Kryeministri Edi Rama, i cili ndodhet në Fier, u ndal në këtë park për t’u njohur me ecurinë e impiantit, së bashku me zv.kryeministren dhe ministren e Infrastrukturës dhe Energjisë Belinda Balluku.
“Është një nga projektet më të mëdha edhe në rajon, për sa i përket projekteve të prodhimit energjetik diellor të vetëfinancuar dhe për të thënë të drejtën është kthyer në një nga projektet shembull për të gjithë sektorin energjetik shqiptar, duke qenë se pas këtij projekti ne kemi pasur shumë aplikime të tjera dhe një pjesë e tyre janë miratuar, një pjesë e mirë kanë nisur nga puna”, u shpreh Balluku.
Balluku solli në vëmendje se shtimi i kapaciteteve në energjinë e rinovueshme po kryhet bazuar në eficiencën e energjisë.
“Kështu që i kujtojmë të gjithë qytetarëve që kemi nisur fazën e dytë për aplikimet e paneleve diellore.
Kemi 2000 njësi të disponueshme dhe ashtu siç patëm sukses në thirrjen e parë, shpresojmë shumë që këto 2000 njësi të ezaurohen sa më parë dhe të përdoren nga qytetarët për ngrohjen e ujit, duke ulur kështu 20-30% të faturave” – shpjegoi zv.kryeministrja e ministrja e Infrastrukturës dhe Energjisë Belinda Balluku.
”Blue 1” ka krijuar partneritete kyçe dhe ka nënshkruar marrëveshje me aktorë të rëndësishëm në tregun rajonal dhe ndërkombëtar të energjisë, të cilët zgjerojnë aksesin në treg.
