Mbrëmjen e djeshme, gazetari investigativ Artan Hoxha ka deklaruar se në dëshminë e të penduarit të drejtësisë, Nuredin Dumani ka përmendur edhe presidentin Ilir Meta.
Pas kësaj deklarate, ka ardhur reagimi i SPAK që përgënjeshtron.
“Në vijim të interesimit të shtuar të mediave, në lidhje me deklarimin e gazetarit Artan Hoxha për sa i përket të dhënave të pretenduara si të deklaruara nga shtetasi nën hetim N.D. për Presidentin e Republikës së Shqipërisë, të transmetuar në televizionin Kombëtar “Klan”, në emisionin “Opinion” të datës 02.06.2022, sqarojmë opinionin publik se:
Në deklarimet e dhëna në kuadër të procedimit penal nr.75/2022 që po heton Prokuroria e Posaçme, shtetasi nën hetim N.D., nuk ka deklaruar asnjë të dhënë në lidhje me Presidentin e Republikës së Shqipërisë.
Duke marrë shkas nga ky rast, si dhe duke mbajtur në konsideratë edhe trajtimet që i janë bërë deklarimeve të shtetasit N.D. në emisione të ndryshme televizive, ftojmë mediat që të jenë të kujdesshme, të mbajnë në konsideratë ndjeshmërinë e kësaj çështje, të respektojnë viktimat dhe familjarët e tyre, si dhe faktin se çështja është në fazën e hetimit paraprak dhe Gjykata e Posaçme e Shkallës së Parë Për Korrupsionin dhe Krimin e Organizuar referuar nenit 103 të Kodit të Procedurës Penale ka vendosur ndalimin e publikimit të vendimit nr.42 datë 17.05.2022 (me objekt caktimin e masave të sigurimit)”, sqaron SPAK.
Në studion e ABC Live, Artan Hoxha ka reaguar pas deklaratës së SPAK. Hoxha tha SPAK u ka rrjedhë informacioni për hetimet, ndërsa shtoi se jo vetëm Meta por edhe tre katër deputetë të tjerë janë përmendur.
Më tej u shpreh se SPAK po vepron me dy standarde, pasi sapo përmendet një politikan reagon, ndërsa për qytetarët e thjeshtë të perëndur nga Duamani, nuk bën asnjë lloj reagimi.
Vijon…
