Deputeti i PD-së, Flamur Noka, pjesë e grupit të Rithemelimit i është përgjigjur kreut të grupit demokrat Enkelejd Alibeajt që i cilësoi të parregullta zgjedhjet që po mbahen sot gati në 70% të degëve të PD-së në rrethe.
Përmes një deklarate për mediat nga selia blu, Noka tha se procesi po zhvillohet normalisht sipas statutit të përcaktuar dhe shprehu gatishmërinë se aty ku ka probleme të verifikohen, por e theksoi se nuk do të ndalen drejt Kuvendit të 30 prillit.
“PD ka qenë dhe mbetet e hapur për të diskutuar me cdo deputet dhe demokrat për specifikat që kanë hasur.
Për këtë arsye jemi gati të verifikohet cdo procedurë nëse është zhvilluar sipas kuvendit të 11 dhjetorit.
Por në asnjë rast, procesi i nisur prej muajsh nga kuvendi i 11 dhjetorit dhe që u rikonfirmua në 6 mars nuk do të ndalojë” tha ai.
Flamur Noka u shpreh se Enkelejd Alibeajt dhe Lulzim Basha që e shikon pas tij dhe të tjerë kanë vetëm dy rrugë.
“Mirëpresim të gjithë ata që duan të bëhen pjesë, por nuk do të lejojmë askënd ta pengojë, për shkak të frikës Basha-Alibeaj kanë nga përballja me votën e demokratëve.
Nuk kemi kohë për të humbur, kush dëshiron të lidhë fatin e tij me veglat e Ramës le ta bëjë por koha e pengmarrjes së PD-së ka marrë fund” tha ai.
Deklarata e plotë
Grupi parlamentar është një organ shumë i rëndësishëm i Partisë Demokratike. Partia Demokratike është e vendosur të respektojë dhe të garantojë të drejtat statutore të cdo organi, por mbi të gjitha është vullneti i anëtarësisë së Partisë që vendos qëndrimin politik të saj.
Me këtë rast, theksoj, se askush nuk do mundet më të organizojë procese ku 1958 karrike të lexohen si 5004 delegatë.
Askush nuk do mundet më, të zëvendësojë votën e lirë me blinda apo gaz lotsjellës.
Askush nuk mundet më të manipulojë me firma fiktive vullnetin e deputetëve dhe grupit parlamentar të PD.
Koha e përjashtimeve ka përfunduar dhe bashkë me të dhe koha kur vullneti i shumicës injorohej.
PD ka qenë dhe mbetet e hapur për të diskutuar në frymë konstruktive me çdo deputet dhe demokrat për problematikat sepcifike që mund të kenë konstatuar në zonat e tyre.
Për këtë arësye, jemi të gatshëm që me grupe auditi të verifikohet çdo procedurë zgjedhore, nëse është zhvilluar conform statutit të PD miratuar në Kuvendin Kombëtar të 11 dhjetor 2021 dhe udhëzimeve përkatëse.
Por në asnjë rast, dhe në asnjë rrethanë, procesi I nisur prej muajsh nga Kuvendi i 11 Dhjetorit dhe i rikonfimuar bindshëm nga vota e demokratëve në zgjedhjet e 6 marsit, nuk do të ndalojë!
Mirëpresim të gjithë ata që janë bërë apo kërkojnë të bëhen pjesë e këtij procesi, por nuk do të lejojmë askënd që ta pengojë atë për shkak të frikës që Basha- Alibeaj kanë nga përballja me vullnetin e demokratëve.
Bashkimi vjen përmes votës së lirë.
Deri më sot ajo ka qenë e vonuara e madhe. Nuk kemi më kohë për të humbur! Kush dëshiron të lidhë fatin e tij me veglat e Edi Ramës është i lirë ta bëjë, por koha e pengmarrjes së opozitës ka marrë fund!
Të gjithë ne deputetë apo anëtarë të thjeshtë jemi të detyruar të pranojmë vendimet e kuvendit Kombëtar të 11 Dhjetorit që detyroi process zgjedhor dhe Kuvendin e rradhës.
Kuvendi është Forumi më i lartë vendimmarrës në Partinë Demokratike. Askush nuk ka tagër të diskutojë e aq më pak të anulojë vendimet e tij, pasi kështu do të vijonte praktika e shëmtuar ku mendimi I anëtarësisë nuk përfillej.
Të gjithë të bashkohemi në Kuvendin Kombëtar të 30 Prillit. Le të flasim hapur dhe ndershëm, le të paraqesim cdo platformë dhe të votojmë cdo propozim të hedhur.
Në fund të respektojmë votën dhe vendimet e Kuvendit Kombëtar.
