Një ngjarje e rëndë ka ndodhur në minierën e Katjelit ku humbi jetën 58-vjeçari Sajmir Bego. Në lidhje me ngjarjen ka reaguar administratori Gëzim Balla. Ky i fundit ka shprehur keqardhjen për tragjedinë e ndodhur.
Sakaq, Gëzim Balla është shprehur se prej disa ditësh miniera nuk ishte në gjendje pune për nxjerrjen e mineralit.
“Gjatë ditëve të fundit në galeri është punuar për të krijuar kushte optimale për punë. Sot rreth mesditës gjithçka ka qenë gati për rifillimin e procesit normal të punës.
Drejtuesi teknik i kompanisë, Hysni Kllogjri, ka inspektuar kushtet e sigurisë në galerinë e minierës dhe para fillimit të punës ka trajnuar minatorët si zakonisht për të filluar punën, duke ju kujtuar zbatimin e të gjitha standarteve të sigurisë gjatë punës në galeri.
Siguria e jetës së minatorëve është dhe do të jetë një nga parimet tona më të rëndësishme në këtë sipërmarrje. Përgjegjës turni Gëzim Kllogjri, në mesditë, më ka njoftuar për aksidentin tragjik ku një nga minatorët ka humbur jetën.
Kjo ngjarje na ka shokuar dhe ndjehem mjaft i lënduar. Paraprakisht jam informuar se nga tavani i galerisë ka patur shembje dhe minatori 58-vjeçar është aksidentuar me vdekje, pasi është goditur në kokë nga një gur.”-u shpreh Balla.
