Vallëzimi i Donald dhe Melania Trump në ballo me titull “Komandanti në Krye” ka tërhequr vëmendjen e madhe të përdoruesve të rrjeteve sociale, të cilët kanë shpërthyer me komente pas këtij momenti të paharrueshëm që shënoi rikthimin e Trump në postin e Presidentit të Shteteve të Bashkuara dhe Melania-n në rolin e Zonjës së Parë. Balloja, që u mbajt me rastin e inaugurimit të Trump, i dedikohet të gjitha degëve të ushtrisë amerikane dhe përfshiu një numër vallëzimesh me ushtarë të ndryshëm, përfshirë një moment special me Zëvendëspresidentin J. D. Vance dhe bashkëshorten e tij, Usha.
Një moment i veçantë ishte vallëzimi i Melania-s me një anëtar të Gardës Nderi të Forcave Ajrore, Henry Wallen, i cili mori shumë vëmendje nga komentuesit në rrjete sociale. Komentet nuk munguan, duke theksuar buzëqeshjen e saj dhe angazhimin që shfaqi gjatë vallëzimit. “Melania sapo vallëzoi me një ushtar të ri në ballo dhe nuk e kam parë kurrë kaq të buzëqeshur” dhe “Dua dikë që të më shikojë ashtu siç Melania shikon ushtarin që vallëzoi me të” janë disa nga komentet që janë shpërndarë gjerësisht.
Balloja, që kishte një atmosferë elegante dhe ushtarake, është mbajtur nën vëmendjen e mediave dhe publikut për natyrën e saj ceremoniale dhe për momentet intime që ofroi. Ky event ka shërbyer gjithashtu për të reflektuar për rrugëtimin e veçantë të Melania-s në jetën publike, e cila ka kaluar nga modelja sllovene në Zonjën e Parë të Shteteve të Bashkuara. Gjatë fushatës së vitit 2016, një numër fotografish të saj nga e kaluara u rikthyen në vëmendje, përfshirë ato ku pozonte nudo, duke e bërë atë një figurë të diskutuar për natyrën e saj jo tradicionale si grua e presidentit.
