Detaje të reja bëhen me dije nga ekzekutimi me breshëri kallashnikovi në Shkodër.
Mark Kodra 47-vjeçari i cili vrau Emiljano Ndoun, pretendon se 25-vjeçari kishte kohë që e mundonte duke i sjellë probleme.
“Nuk e durova më. Ma kishte sjellë te hunda”, ka deklaruar autori në momentin e arrestimit nga policia e Shkodrës. Në fjalët e para autori ka deklaruar se viktima para se ta vriste i ka kaluar me një motor përpara shtëpisë duke bërë shumë zhurmë.
47-vjeçari ka treguar se në atë moment ka marrë armën automatik kallashnikov dhe ka dalë nga banesa si dhe ka qëlluar në drejtim të Emiljano Ndout duke e lënë të vdekur në vend.
Dyshohet se viktima ka ngacmuar vajzat e 47 vjeçarit dhe se palët edhe më herët kanë debatuar për këtë çështje.
Familjarët e autorit të dyshuar deklaruan se 47-vjeçari ka menduar se 25-vjeçari nuk ka vdekur ndaj është futur serish në banesë.
Në momentin kur ka mbërritur policia autori nuk ka pranuar vrasjen e kryer dhe është shfaqur i qetë.
