Onejda Ymeraj ju cënua e liria dhe fshehtësia e korrespodencës dhe e drejta për mbrojtjen e të dhënave personale me këqyrjen e komunikimeve të postës elektronike dhe aplikacioneve on line që nuk duhet të bëheshin nga SPAK, por me vendim gjyqësor.
Ky është thelbi i vendimit të gjykatës kushtetuese që i dha pjesërisht të drejtë qytetares të cilës në shkurt 2024 ju sekuestrua telefoni mbasi ishte thirrur për tu pyetur si person që ka dijeni në hetimet ndaj Arben Ahmetaj. Pjesa tjetër e të drejtës ju dha edhe SPAK nga gjyqtarët kushtues që konstatojnë se ka pasur ndërhyrje me sekuestrimin e telefonit por kjo ndërhyrje është bërë me ligj dhe për interes publik.
Kushtetuesja foli edhe për pretendimin e Onejda Ymerit se i ishte cënuar e drejta e pronës private me bllokimin e telefonit nga hetuesit e SPAK pa kaluar përmes gjykatës, duke vlerësuar se kërkuesja nuk ka paraqitur argumente të mjaftueshme ndaj kjo kërkesë nuk mund të merret në shqyrtim. Ky vendim i kushtetueses prek mënyrën se si veprohet për këqyrjet elektronike dhe sekuestro e telefonave për të cilët nënkuptohet edhe sekuestrimi i korrespodencës së përdoruesit që sipas gjykatës kushtetuese duhet kryer sipas standardeve ndërkombëtare.
Në tre vjet SPAK ka sekuestruar 978 telefona, shumica në kushtet e flagrancës dhe pa vendim gjykate. Në rastin Ymeraj gjykata urdhëron se pavarësisht sekuestrimit të pajisjes apo vetë korrespodencës në kushtet e urgjencës gjykata thekson ndjekjen e garancive si edhe për rastin e sekuestrimit të të dhënave personale.
Gruaja u thirr në shkurt 2024 për t’u pyetur për llogari të procedimit penal në ngarkim të ish-zv kryeministrit Arben Ahmetaj.
“Ditën e thirrjes unë paraqita për të dhënë deklarimet”, shkruante në padi Ymeraj “për aq sa kisha dijeni dhe në të njëjtën ditë OPGJ më kërkuan tu dorëzoja telefonin personal”.
“Ndonëse kërkova të konsultohesha me avokatin, kërkesa u refuzua”, tha ajo.
Ymerit ju vendos në dispozicion procesverbali i datës 26 shkurt 2024 ku ishte vendosur nga SPAK sekuestrimi i aparatit telefonik, të cilin ajo e kundërshtoi në gjykatë edhe me pretendimin se ky bllokim telefoni e kishte penguar në punën e saj përsa kishte të shënuar numrat e telefoni, e-mailet dhe të dhëna të tjera.
