Jonida Vokshi, moderatorja e Big Brother VIP Kosova 4, ka shfrytëzuar së fundmi një sesion pyetje-përgjigjesh në Instagram për të dhënë disa detaje rreth sezonit të ri, i cili pritet të nisë më 17 Nëntor. Përveç kurioziteteve të ndjekësve rreth formatit, ajo është ndalur edhe te roli i opinionistëve, një element që çdo vit ngjall diskutime dhe pritshmëri.
Gjatë bisedës online, një ndjekëse e ka pyetur Jonidën se sa opinionistë do të ketë këtë edicion, duke shtuar se shumë fansa kanë menduar se këtë herë mund të ketë 3. Moderatorja nuk ka dhënë një përgjigje të gjatë, por ka ndarë në Instagram një imazh ku shfaqet e shkruar vetëm fjala “Dy”, duke konfirmuar kështu se numri i opinionistëve do të mbetet i njëjtë si çdo sezon.
Kjo nënkupton që, edhe këtë vit, dy opinionistë do të jenë pjesë e panelit që do të shoqërojë Jonidën dhe Alaudinin gjatë Prime-ve live, duke analizuar debatet, dinamikat dhe ngjarjet brenda shtëpisë së BBVK.
Edhe pse emrat ende nuk janë bërë publikë, lajmi ka ngjallur interes të madh në rrjet, sidomos pas zërave që qarkulluan se mund të kishte ndryshime ose zëvendësime në panel.
Ndërkohë, pritja për sezonin e ri vetëm sa po rritet, dhe publiku duket i përgatitur për një tjetër kapitull të mbushur me surpriza, tensione dhe përballje live nga shtëpia më e famshme në Kosovë.
