Amerika duhet të bëhet e ashpër kundër karteleve meksikane të drogës, deklaroi në fillim të këtij muaji ish-Prokurori i Përgjithshëm i SHBA, William Barr.
Duke i krahasuar me ISIS-in, ai mbështeti një rezolutë të përbashkët nga dy senatorë republikanë, duke i dhënë presidentit amerikan autoritet për të vendosur ushtrinë kundër karteleve në Meksikë.
Dështimi për ta bërë këtë, paralajmëroi ai, do t’i lejonte kartelet të vazhdojnë të vërshojnë SHBA-në me “drogat e tyre vdekjeprurëse në shkallë industriale”.
Strategjia e Amerikës kundër drogës ishte e paefektshme sepse, tha ai, “ajo e lë të paprekur zinxhirin e furnizimit të drogës… progresi i vërtetë kërkon sulmin agresiv të furnizimit të drogës në burimin e saj. Koka e gjarprit është në Meksikë.”
Europa duhet të zbatojë një qasje të ngjashme nëse dëshiron të zgjidhë krizën e emigrantëve. Marrëveshja e rënë dakord javën e kaluar midis Britanisë dhe Francës për të trajtuar krizën e anijeve të vogla në Kanal nuk do të ketë sukses më vete sepse nuk e sulmon krizën në burimin e saj, shkruan albeu.com.
Rishi Sunak dhe Emmanuel Macron janë të vetëdijshëm për këtë. Në deklaratën e përbashkët të lëshuar në përfundim të samitit të së premtes në Paris, kishte një zotim për të “forcuar shkëmbimin e informacionit dhe bashkëpunimin për një sërë kërcënimesh”; këto përfshijnë terrorizmin, trafikun e drogës dhe “krimin e organizuar të lidhur me emigracionin”.
Mafia shqiptare ka krijuar rrjete trafikimi në të gjithë Afrikën e Veriut
Vihet re se javët e fundit ka pasur një ndryshim në retorikën e Sunak. Sunak ka përsëritur se çelësi për të goditur krizën e emigrantëve është “thyerja e ciklit të bandave kriminale”.
Koka e gjarprit të trafikut të Europës është Shqipëria, rrjeti i fuqishëm mafioz i së cilës është përhapur në perëndim prej dy dekadash. Vitin e kaluar qeveria gjermane raportoi se kishte 40 banda shqiptare në vend, të cilat po pasuroheshin dhe po bëheshin më të dhunshme, ndërsa zgjeronin drogën dhe trafikun e njerëzve. Kjo prani përsëritet në Belgjikë, Spanjë, Greqi, Francë, Luksemburg dhe tani në Britani.
Pikat e forta të mafies shqiptare janë, sipas policisë belge, “disiplina, besueshmëria dhe profesionalizmi i gangsterëve, (dhe aftësia e tyre për t’u lidhur)… veçanërisht shpejt me organizatat e tjera kriminale”.
Një lidhje e tillë është me kartelet e drogës latino-amerikane, të cilët furnizojnë shqiptarët me kokainën që futet kontrabandë në Evropë, shkruan albeu.com.
William Barr foli për mënyrën sesi kartelet meksikane “përdorin taktikat e ryshfetit dhe terrorit për të ngulitur veten”.
Ky ka qenë edhe modus operandi i mafies shqiptare. Në vitin 2016, Europol, agjencia e BE-së për bashkëpunimin e zbatimit të ligjit, raportoi se 90 për qind e emigrantëve që arrinin në BE përdornin një rrjet kontrabande, duke gjeneruar nga 5 deri në 6 miliardë dollarë (4 deri në 5 miliardë paund) për bandat kriminale. Duke punuar me mafian italiane, shqiptarët, sipas një think-tank francez, kanë “korruptuar mijëra nëpunës civilë, të cilët për këtë arsye mbyllin sytë ndaj cilësisë së letrave false, apo edhe ndihmojnë në nxjerrjen e tyre”.
Shqipëria ngriti Strukturën e Posaçme Kundër Korrupsionit dhe Krimit të Organizuar (Spak) në vitin 2019 të kryesuar nga Arben Kraja, kryeprokuror special. Në një intervistë në vitin 2021, ai pranoi se “grupet e organizuara kriminale po rrisin aktivitetet e tyre…për të përfituar nga mundësitë e ofruara nga globalizimi”.
Kraja tha se Spak u përball me një sfidë të madhe, një sfidë e vështirësuar nga “korrupsioni dhe mosndëshkimi i zyrtarëve të nivelit të lartë”.
Mes të akuzuarve apo të dënuarve në Shqipëri për korrupsion është një ish-ministër i qeverisë dhe ish-kryeprokurori i vendit.
Mafia shqiptare ka krijuar rrjete trafikimi në të gjithë Afrikën e Veriut, nga Maroku në Libi, si dhe në Ballkan, duke kontrolluar rrugët e migrimit dhe kampet e tranzitit. Vitet e fundit, ata janë shtyrë në veri të Francës, prandaj numri i anijeve të vogla në të gjithë Kanalin u rrit që nga viti 2018. Megjithëse shqiptarët organizojnë rrjetet, zakonisht janë bandat kurde, siriane dhe marokene që janë të pranishme në plazhe, shkruan albeu.com.
Në një intervistë vitin e kaluar, Barr tha se ai kishte vizituar Meksikën disa herë si Prokuror i Përgjithshëm, por gjeti se Andrés Manuel López Obrador ishte një president “që beson në përqafime, jo në plumba”. Për rrjedhojë, qeveria kishte “humbur kontrollin e vendit”.
Europa nuk mund të lejojë një situatë të ngjashme në Shqipëri. Dhjetorin e kaluar Rishi Sunak takoi kryeministrin shqiptar Edi Rama në Londër. Në një komunikatë të lëshuar nga Nr. 10, u njoftua se të dy vendet do të forcojnë më tej “bashkëpunimin e shkëlqyer operacional në zbatimin e ligjit, me objektivin e frenimit dhe ndërprerjes së migracionit të paligjshëm dhe depërtimit në rrjetet kriminale.”/Albeu.com/
