Partia Demokratike ka dërguar një kërkesë për informacion Prokurorisë së Posaçme, këtë të mërkurë.
Me anë të kërkesës, PD ka kërkuar informacion në lidhje me hetimet të cilat kanë nisur për krimet zgjedhore nga ana e SPAK, në kuadër të fushatës zgjedhore paralamentare të 11 majit.
Në shkresën e drejtuar nga drejtuesi i Departamentit të Drejtorisë në PD, Franc Nuri, theksohet se tashmë kanë kaluar 2 muaj nga task forca e dedikuar për hetimin e krimit zgjedhor.
PD-ja ka kërkuar informacion se sa hetime kanë nisur si rrjedhojë e iniciativës së SPAK dhe sa kanë ardhur si rrjedhoje e denoncimeve/ kallëzimeve?
Letra e zbardhur:
Kërkesë për informacion
Nga: Z. Franci NURI, Drejtues i Departamentit të Drejtesisë në Partinë Demokratike. Me adresë komunikimi: Partia Demokratike, Bulevardi “Zhan d’Ark”, nr. 11, Tiranë dhe E-mail: [email protected]
Baza ligjore:
Ligji Nr. 119/2014 “Për të drejtën e informimit”, i ndryshuar; Ligji Nr. 8580, datë 17.02.2000 “Për Partitë Politike”, i ndryshuar.
Drejtuar:
STRUKTURA E POSAÇME KORRUPSIONIT DHE KUNDËR KRIMIT TË ORGANIZUAR (SPAK)
Z. Dumani,
Në janar të vitit 2025 SPAK ka ngritur një task forcë të dedikuar për hetimin e krimit zgjedhor. Gjithashtu, kemi marrë dijeni se SPAK ka lidhur marrëveshje bashkëpunimi me KQZ për hetimin e krimeve zgjedhore. Sot që kanë kaluar dy muaj nga krijimi i saj si dhe pak ditë para nisjes së fushatës zyrtare zgjedhore, kërkojmë informacion për sa më poshtë vijon:
Sa hetime ka nisur SPAK për krime zgjedhore nga janari i vitit 2025 deri në ditën e përgjigjes tuaj?
Sa nga këto hetime i keni nisur me iniciativën tuaj (kryesisht) dhe sa kanë ardhur si rrjedhoje e denoncimeve/ kallëzimeve?
Duke ju falenderuar,
DREJTUESI I DEPARTAMENTIT TË DREJTËSISË NË PARTINË DEMOKRATIKE
Franci NURI
