Një tjetër grusht shteti ka ndodhur në Afrikë këtë javë. Një grup oficerësh të lartë ushtarakë në Gabon u shfaqën në televizionin kombëtar në orët e para të së mërkurës dhe thanë se kishin marrë pushtetin.
“Në emër të popullit të Gabonit, ne kemi vendosur të mbrojmë paqen duke i dhënë fund regjimit aktual”.
Ky veprim vjen pak ditë pasi autoritet vendase certifikuan rezultatin se presidenti Ali Bongo kishte fituar një mandat të tretë.
Oficerët që ndërmorën grushtin e shtetit thanë se përfaqësonin të gjitha forcat e sigurisë dhe mbrojtjes në vendin e Afrikës Qendrore. Ata njoftuan anulimin e rezultatit të zgjedhjeve, mbylljen e kufijve deri në një njoftim të dytë dhe shpërndarjen e institucioneve shtetërore. Gaboni është vend anëtar i OPEK-ut.
Familja Bongo kontrollon prej 56 vjetësh pushtetin politik në vend, shkruajnë mediet ndërkombëtare, ndërkohë që tensionet ishin të larta në vendin e varfër afrikan, por të pasur me kakao dhe naftë.
Nëse do të rezultojë i suksesshëm, ky është grushti i tetë i shtetit në Afrikën Perëndimore dhe Qendrore që nga viti 2020.
