Këtë të enjte, aktori i humorit i shpallur dhe investitor strategjik, Gazmend Paja, është paraqitur në ambientet e Prokurorisë së Posaçme (SPAK).
Qëndrimi i tij në SPAK nuk ka zgjatur shumë, ndërsa pas daljes ka treguar se i kanë marrë telefonin.
Gazetarët: Hera e dytë në SPAK, ishe si aktor apo si investitor strategjik?
Ai iu përgjigj shkurtimisht me nota humori: “Jo, isha me prokurorin në kafe, pa dashje mori celularin tim dhe solli të tijin dhe mori timin. Nuk e njoh prokurorin”.
Nuk dihet ende arsyeja e thirrjes së tij në SPAK, por sipas raportimeve Paja ka qenë i pranishëm edhe dy ditë më parë në ambientet e Prokurorisë.
Aktori i humorit është shpallur investitor strategjik, ku në bregdetin e jugut dhe kompania e tij “Ecotech Energy Services” së bashku me kompaninë “Startek” kanë marrë 133 mijë m2 tokë në Dhërmi.
